අලි ඇතුන් මුදාහැරීමට මහේස්ත්‍රාත් දුන් නියෝගය ශ්‍රේෂ්ඨාධිකරණය අත්හිටුවයි

ලියාපදිංචි නොකළ අලි ඇතුන් කිහිපදෙනකු සන්තකයේ තබා ගැනීමේ සිද්ධීන් සම්බන්ධයෙන් කොළඹ අතිරේක මහෙස්ත්‍රාත් අධිකරණයක් හමුවේ පවතින නඩු කටයුත්තක් විභාග කිරීම වළක්වමින් එම අධිකරණය වෙත නියෝගයක් නිකුත් කළ ශ්‍රේෂ්ඨාධිකරණය වහාම එම නඩුව තම අධිකරණය භාරයට ගන්නා ලෙසට ද ඊයේ (07දා) නියෝග කළේය.

එම නඩුකරයට අදාළව කිසිදු ඉදිරි පියවරක් නොගන්නා ලෙසට ද මහෙස්ත්‍රාත් අධිකරණයට නියෝග කළ ශ්‍රේෂ්ඨාධිකරණය අපරාධ පරීක්‍ෂණ දෙපාර්තමේන්තුව විසින් මහෙස්ත්‍රාත් අධිකරණය හමුවේ ගොනුකර ඇති එම නඩු කටයුත්ත සම්බන්ධයෙන් ලබාදී ඇති සියලුම නියෝග තම අධිකරණය හමුවේ පවතින පෙත්සම් විභාගය අවසන් වනතුරු අත්හිටුවමින් තවත් නියෝගයක් ද නිකුත් කළේය.

නීති විරෝධී අන්දමින් සන්තකයේ තබාගෙන සිටියදී අපරාධ පරීක්‍ෂණ දෙපාර්තමේන්තුව විසින් අත්අඩංගුවට ගත් හීලෑ අලි ඇතුන් කිහිපදෙනකු එකී සන්තකයේ තබාගත් පුද්ගලයන්ටම යළි මුදාහරින ලෙසට කොළඹ අතිරේක මහෙස්ත්‍රාත් අධිකරණයක් විසින් ලබාදී තිබූ නියෝගයක් නීති විරෝධී බව පෙන්වා දෙමින් ජනාධිපති නීතිඥ සංජීව ජයවර්ධන මහතා කළ කරුණු දැක්වීමක් සලකා බැලූ ප්‍රීති පද්මන් සුරසේන හා අර්ජුන ඔබේසේකර යන මහත්වරුන්ගෙන් සමන්විත විනිසුරු මඬුල්ල එම නියෝග කළහ.

ස්වභාවික හා සංස්කෘතික අධ්‍යයන කේන්ද්‍රය ඇතුළු පාර්ශ්ව කිහිපයක් මින් පෙර ගොනුකර තිබූ නඩුවක් මෝසමක් මගින් ඊයේ (07දා) කැඳවිණි.

ලියාපදිංචි නොකළ අලි ඇතුන් සන්තකයේ තබා ගැනීමේ සිද්ධීන් සම්බන්ධයෙන් කොළඹ මහෙස්ත්‍රාත් අධිකරණය හමුවේ ගොනු කර තිබෙන නඩුවට අදාළව වනජීවී දෙපාර්තමේන්තුව භාරයේ රඳවා සිටින අලි ඇතුන් මුදාහැරීම වළක්වමින් අභියාචනාධිකරණය විසින් නියෝගයක් නිකුත් කර තිබියදීත් මහෙස්ත්‍රාත් අධිකරණය විසින් අලි ඇතුන් භාරයේ තබාගෙන සිටි පුද්ගලයන්ගේ ඉල්ලීම පරිදි මින් දින කිහිපයකට පෙර එකී නියෝගය නිකුත් කර ඇතැයි ද ජනාධිපති නීතිඥ සංජීව ජයවර්ධන මහතා ශ්‍රේෂ්ඨාධිකරණයට වැඩිදුරටත් පෙන්වා දුන්නේය.