එක්සත් අරාබි එමීර් රාජ්‍යයට ජනපතිගෙන් කෘතඥතාව

ශ්‍රී ලංකාවට බලපා ඇති දැඩි ගංවතුර සහ ආපදා තත්ත්වයෙන් පීඩාවට පත් ජනතාවට සහන සැලසීම සඳහා එක්සත් අරාබි එමීර් රාජ්‍යය ලබා දුන් කඩිනම් මානුෂීය ආධාර සම්බන්ධයෙන් ජනාධිපති අනුර කුමාර දිසානායක මහතා සිය ස්තුතිය පළ කර තිබේ. එක්සත් අරාබි එමීර් රාජ්‍යයේ ජනාධිපති ෂෙයික් මොහොමඩ් බින් සයිඩ් අල් නහියන් මහතා සමඟ ඊයේ (19) පවත්වන ලද විශේෂ දුරකථන සංවාදයකදී ජනාධිපතිවරයා මෙම කෘතඥතාව පළ කළේය.

මෙම දුරකථන ඇමතුම අතරතුර ෂෙයික් මොහොමඩ් බින් සයිඩ් මහතා ගංවතුර හේතුවෙන් ජීවිත අහිමි වූ ලාංකිකයන් වෙනුවෙන් සිය බලවත් සංවේගය පළ කළේය. පවතින අභියෝගාත්මක තත්ත්වයට මුහුණ දීම සඳහා ශ්‍රී ලංකා රජයට සහ ජනතාවට ධෛර්යය ප්‍රාර්ථනා කළ ඒ මහතා, ආපදාවෙන් සිදු වූ හානිය තක්සේරු කර වැඩිදුර සහාය ලබා දීම සඳහා විශේෂ නියෝජිත කණ්ඩායමක් මෙරටට එවීමට ද එකඟතාව පළ කර ඇත.

එක්සත් අරාබි එමීර් රාජ්‍යයේ ජාත්‍යන්තර ආධාර සැපයීමේ නියෝජිතායතනය සහ එමිරේට්ස් රෙඩ් ක්‍රෙසන්ට් සමාජය ඒකාබද්ධව මේ වන විටත් මෙරට සහන මෙහෙයුම් දියත් කර තිබේ. විශේෂයෙන්ම අබුඩාබි සිවිල් ආරක්ෂක කණ්ඩායම් විසින් ආපදාවට ලක් වූ ප්‍රදේශවල සෙවීම් සහ මුදාගැනීමේ කටයුතුවල නිරත වන අතර, අවතැන් වූ පවුල් සඳහා අත්‍යවශ්‍ය ආහාර සහ හදිසි නවාතැන් සැපයීමට ද ඔවුන් පියවර ගෙන ඇත.

ස්වාභාවික විපත් හමුවේ පීඩාවට පත් ජාතීන් කෙරෙහි එක්සත් අරාබි එමීර් රාජ්‍යය අනුගමනය කරන දිගුකාලීන මානුෂීය ප්‍රතිපත්තිය මෙහිදී නැවත වරක් තහවුරු විය. මෙම අසීරු අවස්ථාවේදී දක්වන ලද කඩිනම් සහයෝගය දෙරට අතර පවතින ශක්තිමත් සහ දීර්ඝකාලීන මිත්‍රත්වයේ සුවිශේෂී සන්ධිස්ථානයක් බව ජනාධිපති අනුර කුමාර දිසානායක මහතා වැඩිදුරටත් අවධාරණය කළේය.