පොලිස් දෙපාර්තමේන්තුවේ ජ්‍යෙෂ්ඨ නිලධාරීන් 32 දෙනෙකුට වහාම ක්‍රියාත්මක වන පරිදි ස්ථාන මාරුවීම් ලබා දී ඇත. ජාතික පොලිස් කොමිෂන් සභාවේ අනුමැතියට අනුව මෙම ස්ථාන මාරුවීම් සිදු කර ඇති බව පොලිස් මාධ්‍ය කොට්ඨාසය සඳහන් කරයි.
මෙම ස්ථාන මාරුවීම්වලට අනුව, මධ්‍යම අපරාධ විමර්ශන කාර්යාංශයේ දිසාව භාර නියෝජ්‍ය පොලිස්පතිවරයා ලෙස කටයුතු කළ නිහාල් තල්දූව මහතා මොනරාගල දිසාව භාර නියෝජ්‍ය පොලිස්පතිවරයා ලෙස පත් කර තිබේ. මාණ්ඩලික නියෝජ්‍ය පොලිස්පති තනතුරේ රාජකාරි කරන ජේ.ආර්. ඩයස් මහතාට එම තනතුරට අමතරව මධ්‍යම අපරාධ විමර්ශන කාර්යාංශයේ දිසාව භාර නියෝජ්‍ය පොලිස්පති තනතුරේ රාජකාරි ද ආවරණය කිරීමට සිදුවනු ඇත.
ස්ථාන මාරු කරන ලද නිලධාරීන් අතර නියෝජ්‍ය පොලිස්පතිවරුන් නව දෙනෙකු, ජ්‍යෙෂ්ඨ පොලිස් අධිකාරීවරුන් 16 දෙනෙකු, පොලිස් අධිකාරීවරුන් දෙදෙනෙකු සහ සහකාර පොලිස් අධිකාරීවරුන් පස් දෙනෙකු ඇතුළත් වේ.
මීට අමතරව, බන්ධනාගාර දෙපාර්තමේන්තුවේ මාණ්ඩලික නිලධාරීන් 16 දෙනෙකුට ද ජූලි මස 02 වන දින සිට ක්‍රියාත්මක වන පරිදි ස්ථාන මාරුවීම් ලබා දී තිබේ. නිලධාරීන්ගේ ජ්‍යෙෂ්ඨත්වය සහ සේවා අවශ්‍යතා මත, බන්ධනාගාර දෙපාර්තමේන්තුවේ ආයතනික පරිපාලන කටයුතු වඩාත් විධිමත් කිරීමේ අරමුණින් අධිකරණ හා ජාතික ඒකාබද්ධතා අමාත්‍යාංශ ලේකම්වරයාගේ අනුමැතිය යටතේ මෙම ස්ථාන මාරුවීම් සිදු කර ඇත. බන්ධනාගාර මූලස්ථානයට අනුව, මෙම ස්ථාන මාරුවීම් අතර විශේෂ බන්ධනාගාර අධිකාරීවරුන් දෙදෙනෙකු, බන්ධනාගාර අධිකාරීවරයෙකු සහ සහකාර බන්ධනාගාර අධිකාරීවරුන් 13 දෙනෙකු සිටිති
