ගිනිගත්හේන, දියගල හරහා නෝටන්බ්‍රිජ් සිට ශ්‍රීපාදය දක්වා දිවෙන මාර්ගයේ කොටසක්, හදිසි නඩත්තු කටයුත්තක් හේතුවෙන් දින 10ක කාලයක් සඳහා වසා දැමීමට මාර්ග සංවර්ධන අධිකාරිය පියවර ගෙන තිබේ.
මෙම පියවර ගෙන ඇත්තේ, අදාළ මාර්ගයේ පිහිටි පාලමක් ගිලා බැසීමේ අවදානමකට ලක්ව ඇති බැවින්, ඒ වෙනුවට නව බේලි පාලමක් ඉදිකිරීමටයි. අද (ජුනි 14) සිට ජුනි මස 24 වන දා දක්වා, දින 10ක කාලයක් සඳහා මෙම මාර්ගය වසා තැබෙනු ඇත.
මාර්ගය වසා තබන කාලය තුළ, කොළඹ සිට මෙම මාර්ගයේ ගමන් ගන්නා රියදුරන්ට කළුගල, පොල්පිටිය, ලක්ෂපාන හරහා නෝටන්බ්‍රිජ් මාර්ගය හෝ හැටන්-නෝටන්බ්‍රිජ් මාර්ගය භාවිතා කරන ලෙස නෝර්වුඩ් මාර්ග සංවර්ධන අධිකාරිය දන්වා සිටී.
මෙම අබලන් පාලම පිහිටා ඇත්තේ අදාළ මාර්ගයේ ලොනැක් වත්ත ප්‍රදේශයේ, කැලණි ගඟට ජලය ගලා බසින ඇළ මාර්ගයක් හරහාය. මෙම පාලම වසර 4ක පමණ කාලයක් තිස්සේ දැඩි ලෙස අබලන් තත්ත්වයේ පැවතී ඇති අතර, පවතින අධික වර්ෂාවත් සමඟ එය සම්පූර්ණයෙන්ම කඩා වැටීමේ අවදානමක් පවතින බව ප්‍රදේශවාසීහු පවසති.
