2026 ඡන්ද හිමි නාමලේඛන ප්‍රතිශෝධනය පෙබරවාරි 01 ඇරඹේ

මැතිවරණ කාලයේදී ලතැවෙන්නේ නැතිව ලියාපදිංචිය ගැන විමසිලිමත් වන්න – පැෆරල් අනතුරු අඟවයි

2026 වසර සඳහා වන ඡන්ද හිමි නාමලේඛන සංගණන කටයුතු එළඹෙන 2026 පෙබරවාරි 01 වනදා ආරම්භ කිරීමට නියමිත බව නිදහස් හා සාධාරණ මැතිවරණයක් සඳහා වූ ජනතා ව්‍යාපාරය (PAFFREL) නිවේදනය කරයි.

මෙවර සංගණන ක්‍රියාවලිය සහ එහිදී දේශපාලන පක්ෂවල වගකීම පිළිබඳව පැෆරල් සංවිධානය කරුණු කිහිපයක් අවධාරණය කර සිටී.

🏠 සංගණනය සිදුවන ආකාරය

පසුගිය වසරවල මෙන්ම මෙවර ද සංගණන නිලධාරීන් සෑම නිවසකටම පැමිණෙන්නේ නැත. ඔවුන් පැමිණෙන්නේ:

අලුතින් එක්වන නම් සහ ඉවත් කරන නම් ඇතුළත් “A” සහ “Aa” ලේඛන යාවත්කාලීන කිරීමට අදාළ නිවෙස්වලට පමණි.
ඡන්ද හිමි තොරතුරු රැස් කිරීමට අවශ්‍ය නිවෙස් වෙත පමණක් නිලධාරීන් පැමිණෙනු ඇත.

🔍 පක්ෂ නියෝජිතයන්ට නිරීක්ෂණ අවස්ථාව

ග්‍රාම නිලධාරී වසම් මට්ටමින් මෙම ක්‍රියාවලිය නිරීක්ෂණය කිරීමට දේශපාලන පක්ෂ නියෝජිතයන්ට අවස්ථාව හිමිවේ. නිලධාරීන් තොරතුරු රැස් කරන ආකාරය මෙන්ම, යම් පුද්ගලයෙකු ඡන්දදායකයෙකු ලෙස ලියාපදිංචි කිරීමට සුදුසු ද නැද්ද යන්න පිළිබඳව නිලධාරීන් ලබාදෙන නිර්දේශ නිරීක්ෂණය කිරීමට ද ඔවුන්ට හැකියාව ඇත.

යම් අක්‍රමිකතාවක් නිරීක්ෂණය වුවහොත්, ඒ පිළිබඳව ලිඛිතව සංගණන නිලධාරියා දැනුවත් කළ හැකි අතර එහි පිටපතක් අදාළ දිස්ත්‍රික් නියෝජ්‍ය හෝ සහකාර මැතිවරණ කොමසාරිස්වරයා වෙත යොමු කළ යුතුය.

⚠️ සිදුවිය හැකි අක්‍රමිකතා කිහිපයක්:

සුදුසුකම් ලත් පුරවැසියන්ගේ නම් ලේඛනයට එක් නොකිරීම.
වයස අවුරුදු 18ට අඩු පුද්ගලයන් ඡන්ද ලේඛනයට ඇතුළත් කිරීම.
අදාළ ලිපිනයේ පදිංචි නොවන පුද්ගලයන් ලියාපදිංචි කිරීමට උත්සාහ කිරීම.
ලිපින එකකට වඩා වැඩි ගණනක ලියාපදිංචි වීමට අයදුම් කිරීම.
ව්‍යාජ තොරතුරු ඉදිරිපත් කිරීම.

📢 පැෆරල් සංවිධානයේ අවධාරණය

දේශපාලන පක්ෂවලට මෙම ක්‍රියාවලිය නිරීක්ෂණය කිරීමට අවස්ථාව තිබුණද, බොහෝ පක්ෂ ඒ සඳහා නියෝජිතයන් පත් නොකරන බව පැෆරල් සංවිධානය පෙන්වා දෙයි.

“මැතිවරණයක් ආසන්න වූ විට තමන්ගේ ආධාරකරුවන්ගේ නම් ඡන්ද ලේඛනයේ නැතැයි මැසිවිලි නැගීමෙන් පලක් නැත. දේශපාලන පක්ෂ නියෝජිතයන් දැන් සිටම මෙම ක්‍රියාවලියට සක්‍රීයව දායක වන්නේ නම්, සුදුස්සන් ලේඛනයට ඇතුළත් කිරීමත් නුසුදුස්සන් ඉවත් කිරීමත් සහතික කළ හැකිය.”