රජයේ සේවයේ නියුතු හෙද ශ්‍රේණි හතරක නිලධාරීන් සහ නිලධාරිනියන් වයස අවුරුදු 60 දී අනිවාර්ය විශ්‍රාම ගැන්වීමට පෙර රජය සමයේ අමාත්‍ය මණ්ඩලය ගත් තීරණය ක්‍රියාත්මක කිරීම වළකාලමින් අභියාචනාධිකරණය මීට පෙර නිකුත් කර තිබූ අතුරු තහනම් නියෝගය ශ්‍රේෂ්ඨාධිකරණය විසින් අද (ජූලි 17) බල රහිත කරන ලදී.
ඊට අමතරව, මෙම කරුණට අදාළව අභියාචනාධිකරණය හමුවේ ගොනුකර තිබෙන පෙත්සම යළි විභාගයට ගන්නා ලෙසද ශ්‍රේෂ්ඨාධිකරණය අභියාචනාධිකරණයට නියෝග කර ඇත.
අභියාචනාධිකරණය විසින් නිකුත් කළ අදාළ අතුරු තහනම් නියෝගය නීතියට පටහැනි බවත් එය බල රහිත කරන ලෙසත් ඉල්ලා නීතිපතිවරයා විසින් ගොනු කර තිබූ අභියාචනයක් විභාග කිරීමෙන් අනතුරුව ශ්‍රේෂ්ඨාධිකරණය මෙම නියෝගය නිකුත් කළේය.
යසන්ත කෝදාගොඩ, ජනක් ද සිල්වා සහ ඒ. එච්.එම්.ඩී. නවාස් යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් විසින් මෙම නියෝගය ලබා දී ඇත.
අමාත්‍ය මණ්ඩලය ගත් අනිවාර්ය විශ්‍රාම ගැන්වීමේ තීරණයට එරෙහිව රාජ්‍ය සේවා එක්සත් හෙද සංගමය සහ එහි සභාපති පූජ්‍ය මූරුත්තේට්ටුවේ ආනන්ද හිමි ඇතුළු පිරිසක් විසින් රිට් පෙත්සම් ඉදිරිපත් කර තිබුණි. එම පෙත්සම් විභාග කළ අභියාචනාධිකරණය අදාළ තීරණය ක්‍රියාත්මක කිරීම වළක්වමින් අතුරු තහනම් නියෝගයක් නිකුත් කර තිබුණි.
මෙම අතුරු තහනම් නියෝගය නිකුත් කර තිබෙන ආකාරය නීතියට පටහැනි බවත්, එවැනි නියෝගයක් නිකුත් කිරීමට අභියාචනාධිකරණයට බලයක් නොමැති බවත් සඳහන් කරමින් නීතිපතිවරයා ශ්‍රේෂ්ඨාධිකරණයට මෙම අභියාචනා පෙත්සම ඉදිරිපත් කළේය.
