ජනාධිපතිවරයා සම්බන්ධයෙන්, සමාජ මාධ්‍ය ඔස්සේ තුසිත හල්ඔලුව නමැති අයකු සාවධ්‍ය ප්‍රකාශයක් සිදුකර ඇති බවට ලැබී ඇති පැමිණිල්ලකට අනුව අපරාධ පරීක්ෂණ දෙපාර්තමේන්තුව පරීක්ෂණයක් අරඹා තිබේ. ඔහු ලොතරැයි මණ්ඩලයේ හිටපු ක්‍රියාකාරී අධ්‍යක්ෂවරයකු බව ද එම දෙපාර්තමේන්තුව ප්‍රකාශ කර සිටියි .
ඒ අනුව එම ප්‍රකාශය මගින් මහජන සාමයට හා ජාතික ආරක්ෂාවට ගැටලු උද්ගත වන ආකාරයේ ප්‍රකාශයක් සිදුවී ඇති බැවින් එම ප්‍රකාශයේ අඩංගු කරුණු සම්බන්ධ මුලාශ්‍ර අනාවරණය කරගැනීම සඳහා ඔහුට අද (07දා) උදේ 10.00ට අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙසට දන්වා ඇතැයි පොලිස් මාධ්‍ය කොට්ඨාසය පවසයි.
ජනාධිපති අනුර කුමාර දිසානායක මහතා සම්බන්ධයෙන් එල්ල කරන ලද අවමන්සහගත සහ අසත්‍ය ප්‍රකාශයන් සම්බන්ධව ජනාධිපතිවරයාගේ උපදෙස් මත ඔහුගේ නීතිඥ අකලංක උක්වත්ත මහතා විසින් පසුගිය 04 වැනිදා අපරාධ පරීක්ෂණ දෙපාර්තමේන්තුව වෙත පැමිණිල්ලක් කරනු ලැබීය.
