හිටපු අමාත්‍ය පාඨලීට මහාධිකරණ නියෝග

හිටපු අමාත්‍ය පාඨලී චම්පික රණවක, ඔහුගේ රියැදුරු වශයෙන් කටයුතු කළ දිලුම් තුසිත කුමාර සහ එවක වැලිකඩ පොලිසියේ ස්ථානාධිපති වශයෙන් කටයුතු කළ වත්මන් සහකාර පොලිස් අධිකාරි සුදත් අස්මඩල යන අයට එරෙහිව ගොනුකර තිබෙන නඩුව විභාගය සඳහා නොවැම්බර් මස 18 වැනිදා කැඳවන ලෙස කොළඹ මහාධිකරණය නියෝග කර තිබෙනවා. 2016 වසරේ රාජගිරිය ප්‍රදේශයේදී රිය අනතුරක් සිදුකොට තරුණයකුට බරපතල තුවාල සිදුකිරීම හා ඊට අදාළ සාක්ෂි යටපත් කිරීම ඇතුළු චෝදනා විත්තිකරුවන්ට එල්ල වී තිබෙනවා.

නඩුව අද (25) කොළඹ මහාධිකරණ විනිසුරු සුජීව නිශ්ශංක ඉදිරියේ කැඳවනු ලැබූ අතර, එහිදී මෙම නඩුව පවත්වාගෙන යාමට නොහැකි බව සඳහන් කරමින් විත්තිකාර පාඨලි චම්පික රණවක විසින් ඉදිරිපත් කළ අභියාචනය ශ්‍රේෂ්ඨාධිකරණය විසින් නිෂ්ප්‍රභ කර තිබෙන බවත්, ඒ අනුව මෙම නඩු විභාගය ඉදිරියට පවත්වාගෙන යන ලෙස ශ්‍රේෂ්ඨාධිකරණය විසින් තම අධිකරණයට නියම කර තිබෙන බවයි මහාධිකරණ විනිසුරුවරයා නිවේදනය කළේ.

පැමිණිල්ල වෙනුවෙන් පෙනී සිටි රජයේ නීතිඥවරයා අධිකරණය හමුවේ කරුණු දක්වමින් මෙම නඩුව සඳහා අතිරේක සොලිසිටර් ජනරාල් දිලීප පීරිස් පෙනී සිටින බවත්, මෙම නඩුව විභාගය සඳහා දිනයක් ලබා දෙන ලෙසත් ඉල්ලා සිටියා.

ඒ අනුව, නඩුව විභාගය සඳහා නොවැම්බර් මස 18 වැනිදා කැඳවීමට විනිසුරුවරයා නියෝග කළ අතර, සාක්ෂිකරුවන්ට එදිනට අධිකරණය හමුවේ පෙනී සිටින ලෙස දන්වා සිතාසි නිකුත් කර තිබෙනවා.

විත්තිකාර පාඨලී චම්පික වෙනුවෙන් පෙනී සිටි ජනාධිපති නීතිඥ සරත් ජයමාන්න අධිකරණය හමුවේ ඉල්ලීමක් කරමින් සිය සේවා දායකයාට මේ වන විට පනවා තිබෙන විදේශ ගමන් තහනම මීළඟ නඩු දිනය තෙක් තාවකාලිකව ඉවත් කිරීමේ නියෝගයක් නිකුත් කරන ලෙස ඉල්ලා සිටියා.ඒ අනුව, විත්තිකාර චම්පික රණවකට පනවා තිබූ විදේශ ගමන් තහනම තාවකාලිකව ලිහිල් කිරීමට මහාධිකරණ විනිසුරුවරයා නියම කළ අතර, ඒ බව ආගමන හා විගමන පාලකවරයාට දැනුම් දෙන ලෙසත් නියෝග කර තිබෙන බව සඳහන් වෙයි.