සෞඛ්‍ය අංශවලින් රතු එළියක් – මී උණ සහ ළමා උණ රෝගීන් වැඩිවෙයි!

දිවයින පුරා මී උණ රෝගීන්ගේ කැපී පෙනෙන ඉහළ යාමක් සෞඛ්‍ය අමාත්‍යාංශයේ වසංගත රෝග විද්‍යා අංශය වාර්තා කරයි. සෞඛ්‍ය ප්‍රවර්ධන කාර්යාංශයේ පැවති මාධ්‍ය හමුවකදී අදහස් දැක්වූ ප්‍රජා සෞඛ්‍ය විශේෂඥ වෛද්‍ය තුෂානි දාබරේරා මහත්මිය සඳහන් කළේ, රත්නපුර, කුරුණෑගල, කෑගල්ල, ගම්පහ සහ කළුතර යන දිස්ත්‍රික්කවලින් වැඩි වශයෙන් රෝගීන් වාර්තා වන බවයි.

“මේ රෝගය බෝවෙන්නේ බැක්ටීරියාවකගෙන්. විශේෂයෙන් ක්ෂීරපායි සතුන්ගේ මුත්‍රා මඟින්,” වෛද්‍ය දාබරේරා පැහැදිලි කළාය. “ඇත්තම කියනවා නම්, මීයන්ගේ මුත්‍රා පද්ධතියේ තමයි මේ බැක්ටීරියාව ජීවත් වෙන්නේ. මීයන් වතුර බොන අවස්ථාවන්වලදී මුත්‍රා ජලයට හෝ පසට මුසු වෙනවා. ඒ පසෙන් හෝ ජලයෙන් අපි නිරාවරණය වුණොත් මිනිස්සුන්ට මේ රෝගය බොහෝදුරට වැළඳෙනවා.”
විශේෂයෙන් වී ගොවීන්, පතල් කර්මාන්තයේ නියැලෙන අය, ගංවතුරට නිරාවරණය වූවන් සහ කීට කොටුවල වගා කටයුතු කරන අය මෙම රෝගයට ගොදුරු වීමේ වැඩි අවදානමක් ඇති බව ඇය පෙන්වා දුන්නාය.

මේ අතර, මේ දිනවල ළමුන් අතර පැතිර යන උණ රෝගී තත්ත්වයන් සම්බන්ධයෙන් එම මාධ්‍ය හමුවේදී කොළඹ රිජ්වේ ආර්යා ළමා රෝහලේ ළමා රෝග විශේෂඥ වෛද්‍ය කෝසල කරුණාරත්න මහතා මෙලෙස පැහැදිලි කළේය.
“මේ දවස්වල ළමයින් අතර තද උණ රෝග පැතිරෙනවා. මේක අලුත් දෙයක් නෙමෙයි. මොකද මෝසම් වැසි සමඟ උණ රෝග කිහිපයක් හැම අවුරුද්දේම පැතිරෙනවා. ඒවට අපි කියන්නේ ‘සවර් ෆීවර්’ කියලා. ඒ ප්‍රධාන කාණ්ඩයේ අපිට වැදගත්ම වෙන්නේ ඩෙංගු, මී උණ, ඉන්ෆ්ලුවෙන්සා සහ චිකුන්ගුන්‍යා මෙන්ම උණ සමඟ එන පාචනය.”
“මම දෙන්න ඕන ලොකුම පණිවුඩය තමා, දරුවාට තද උණ සමග වමනය යනවා නම්, බඩ රිදෙනවා නම්, මුත්‍රා පිටවීමේ අඩුවක් තියෙනවා නම් බල බලා ඉන්න එපා, වහාම රෝහලකට යොමු වෙන්න” යනුවෙන් වෛද්‍ය කරුණාරත්න මහතා අවධාරණය කළේය.