සබරගමුව මහ සමන් දේවාලයේ අද (11) දින පැවැත්වීමට නියම කර තිබූ නිලවරණය පැවැත්වීම වළක්වාලමින් අභියාචනාධිකරණය විසින් ඊයේ (10) අතුරු තහනම් නියෝගයක් නිකුත් කළේ ය.
ලබන 20 වන දා තෙක් බල පැවැත්වෙන පරිදි එම අතුරු තහනම් නියෝගය නිකුත් කර තිබිණි.
අභියාචනාධිකරණ විනිසුරු මොහොමඩ් ලෆාර් සහ විනිසුරු කේ.එම්.එස්. දිසානායක යන විනිසුරු මඩුල්ලක් විසින් එම අතුරු තහනම් නියෝගය නිකුත් කළේ ය.
එම දේවාලයේ තාවකාලික භාරකරු වශයෙන් පත් කර තිබූ එස්. වී. චන්ද්‍රසිංහ විසින් ගොනුකර තිබූ පෙත්සමක් ඊයේ දින අභියාචනාධිකරණය හමුවේ සලකා බලනු ලැබීය.
අදාළ නිලවරණය පැවැත්වෙන ආකාරය නීතියට පටහැනි බව සඳහන් කරමින් පෙත්සම්කරු වෙනුවෙන් පෙනී සිටි නීතිඥවරයා ඉදිරිපත් කළ කරුණු සලකා බැලීමෙන් අනතුරුව විනිසුරු මඩුල්ල මෙම නියෝගය නිකුත් කළේය.
