සජබ – එජාප සාකච්ඡා බිද වැටීම ගැන දිනන දකුනින් නිවේදනයක් !

පසුගිය දෙසැම්බර් මාසයේ සිට ආරම්භ වූ එක්සත් ජාතික පක්ෂය සහ සමගි ජන බලවේගය අතර පැවති සාකච්ඡා නිශ්ඵල ලෙස අවසන් වී ඇත. මෙම සාකච්ඡා සාර්ථක නොවීමෙන් පෙනී යන්නේ ශ්‍රී ලංකාවේ සම්ප්‍රදායික දක්ෂිණංශික දේශපාලන පක්ෂ බිඳවැටීමේ අවසාන පියවර බව අපගේ හැඟීමයි.

මෙම සාකච්ඡා අසාර්ථක කිරීමේ වගකීම දෙපාර්ශවයේ නායකයින් භාරගත යුතු අතර දකුණු කඳවුරේ ජයග්‍රහණය හෝ සමඟිය වෙනුවෙන් ඔවුන් තුල කිසිදු අවංක කැපවීමක් නොවිය. රටේ දක්ෂිණාංශ බලවේගයක ප්‍රබලත්වය තහවුරු කිරීම වෙනුවට, පුද්ගලික වාසි, නායකත්වයන්, තනතුරු ආදී වැඩවසම් ප්‍රශ්න මත මේකි නායකයන් මෙම සාකච්ඡා අසාර්ථක කිරීමට කටයුතු කළේය.

මේ අසාර්ථකතාවය, දක්ෂිණාංශ බලවේගයක ප්‍රබල ගොඩනැගීමක් වශයෙන් සැලකිය හැකි අනාගත එක්සත් ආණ්ඩුවක් බිහි කිරීමේ අවස්ථාව අහිමි කිරීමක් වන අතර විපක්ෂය තුළ එකම ආර්ථික හා රාජ්‍ය පාලන ප්‍රතිපත්ති අනුගමනය කරන දෙපාර්ශවයක් වෙන්වීම තුළින් වාමාංශික බලවේගයන් සඳහා ඉදිරියට යාමට වැඩි අවකාශයක් ලබාදීමක් ලෙසද සැලකිය හැක.

දකුණේ දේශපාලන පක්ෂ නායකයන් හට මාලිමා සීතාම්බර සළුවෙන් වැසුණු ජනතා විමුක්ති පෙරමුණු ආණ්ඩුව ‘කොමියුනිස්ට් පක්ෂ රාජ්‍යයක්’ කරා රට ගෙන යන ආකාරය පිළිබඳව කිසිඳු අදහසක් නොමැති බව අප හැඟීමයි. එසේම එම කොමියුනිස්ට් පක්ෂ රාජ්‍යයට එරෙහිව දේශපාලනිකව සන්නද්ධ වීමට ද සැබෑ වුවමනාවක් නොමැත.

කෙසේ නමුත් මෙරට දක්ෂිණාංශික මතවාදය දරන නිදහස අපේක්ෂා කරන දක්ෂිණංශික බලවේගය නැවත එක් කර නව ප්‍රතිපත්ති හා නව මූලධර්ම මත පදනම් වූ, බලවත් දක්ෂිණංශික ජාතික විකල්පයක් බිහි කිරීමට දිනන දකුණ අප බලාපොරොත්තු වන බව දිනන – දක්ෂිණාංශික දේශපාලනය ප්‍රතිස්ථාපනය කිරීමේ සාමූහිකය වැඩිදුරටත් මාධ්‍ය නිවේදනයක් නිකුත් කරමින් සදහන් කල තිබේ .