සංචාරක ක්ෂේත්‍රයට අදාළ විවිධ පහසුකම් සපයන ව්‍යාපාර 50,000කට අධික සංඛ්‍යාවක් පැවැතියත් ඉන් සංචාරක සංවර්ධන අධිකාරියේ ලියාපදිංචිව ඇත්තේ ව්‍යාපාර 8,000 ක් පමණක් බව අනාවරණය වේ. ලියාපදිංචි නොවූ එම ආයතන කඩිනමින් ලියාපදිංචි කර බදු ගෙවන කණ්ඩායම තුළට ඇතුළත් කිරීමට කටයුතු කරන බව සංචාරක නියෝජ්‍ය ඇමැති මහාචාර්ය රුවන් රණසිංහ පැවසීය.
ශ්‍රී ලංකා සංචාරක ක්ෂේත්‍රයේ වත්මන් ප්‍රගතිය සම්බන්ධයෙන් රජයේ ප්‍රවෘත්ති දෙපාර්තමේන්තුවේ ඊයේ (09 වැනිදා) පැවැති මාධ්‍ය හමුවේදී ඔහු මේ බව කියා සිටියේය.
සංචාරක පනතට අනුව සංචාරක ක්ෂේත්‍රයට අදාළව සේවයක් ලබාදෙන ව්‍යාපාරයක් පවත්වාගෙන යාම සඳහා සංචාරක සංවර්ධන අධිකාරියේ ලියාපදිංචිය ලබාගත යුතු බවත්, මාර්ගගත ක්‍රමයට (Online) පවත්වාගෙන යන සංචාරක ක්ෂේත්‍රයට අදාළ ව්‍යාපාරද ඇතුළුව සේවා සපයන ආයතන 50,000 කට අධික සංඛ්‍යාවක් පවතින බවත් ඔහු කීවේය.
අවිධිමත් සංචාරක කර්මාන්තයක් ලංකාව පුරා කාලයක් තිස්සේ ක්‍රියාත්මක බවත්, අසංවිධානාත්මක, අනියම් ආකාරයෙන් ක්‍රියාත්මක එම ආයතන නිසි නියාමනය කිරීම සඳහා සංචාරක සංවර්ධන අධිකාරියේ ලියාපදිංචි කර බදු ගෙවන කණ්ඩායමට ඇතුළත් කරන බවද ඔහු පැවසීය.
එමෙන්ම, විදේශිකයන් සංචාරක ක්ෂේත්‍රයේ ව්‍යාපාරවල නිරතව සිටින බව පසුගිය කාලයේදී නිරීක්ෂණය වූ බවත්, ඇතැම් සංචාරකයන් දීර්ඝ කාලීනව වීසා බලපත්‍රය දීර්ඝ කරමින් මෙරට ව්‍යාපාරවල නිරතව සිටින බවත්, ඇතැමුන් නීත්‍යනුකූලව ආයෝජනවල නිරතව සිටින බවත් හෙතෙම කීවේය. ඇතැම් විදේශිකයන් දේශීය පුද්ගලයන් සමග එකතුවී ඔවුන්ගේ ස්ථාන කුලී පදනම මත ලබාගෙන ව්‍යාපාරවල නිරතව සිටින බවත් ඔහු කීවේය. මෙම තත්ත්වය ක්‍රමානුකූලව කළමනාකරණය කළයුතු බවත්, මෙම ඇතැම් සංචාරකයන් පසුගිය කාලයේදී රටින් පිටුවහල් කිරීමට කටයුතු කළ බවද ඔහු සඳහන් කළේය.
දේශීය පුද්ගලයන්ගේ නිවාස ඇතුළු ගොඩනැගිලි කුලී පදනම මත ලබාගෙන ව්‍යාපාරවල නිරත විදෙස් සංචාරකයන්ට විරුද්ධව නීතිය ක්‍රියාත්මක කිරීමට යාමේදී ඊට ඉදිරිපත් වන්නේ බොහෝ විට ඔවුන්ට නිවාස කුලියට ලබාදුන් මෙරට පුද්ගලයන් බවද නියෝජ්‍ය ඇමැතිවරයා පැවසීය. විදේශීය ආහාර සකස් කිරීම, සම්බාහනය ආදී රැකියාවල මෙරට නිරතවීම සඳහා විදේශිකයන්ට වීසා ලබාදෙන බවත්, මේ වසර තුළදී එවැනි රැකියාවල නිරතවීමට 700 කට ආසන්න පිරිසකට වීසා ලබාදී තිබෙන බවත් කී ඒ මහතා මින් 250 කට වැඩි පිරිසක් සම්බාහනයට අදාළ රැකියාවල නිරත පිරිස බවද පැවසීය.
