ශ්‍රී ලංකාවේ ප්‍රථම ‘ජල බැටරි’ විදුලි ව්‍යාපෘතිය ආරම්භ කෙරේ

                                                                                                                                                                                                                                                            ශ්‍රී ලංකාවේ ප්‍රථම ‘ජල බැටරිය’ වන මහ ඔය පොම්ප කළ ජල ගබඩා විදුලි ව්‍යාපෘතිය ලංකා විදුලි බල මණ්ඩලය විසින් ආරම්භ කරනු ලැබ තිබේ.

නිවේදනයක් නිකුත් කරමින් එම මණ්ඩලය මේ බව සඳහන් කළේ ය.

මෙගාවොට් 600ක ධාරිතාවයකින් යුක්ත මෙම ව්‍යාපෘතිය සූර්ය හා සුළං බලයෙන් ජනනය වන බලශක්තිය අතිරික්තයක් පවතින විට ඒවා ගබඩා කර ඉල්ලුම ඉහළ යන විට එය නැවත විදුලි බල පද්ධතියට සපයනු ලබයි.

2030 වන විට විදුලි උත්පාදනයෙන් 70%ක් පුනර්ජනනීය ප්‍රභවයන්ගෙන්, උත්පාදනය කිරීමේ ශ්‍රී ලංකාවේ ඉලක්කය සාක්ෂාත් කර ගැනීම සදහා මෙම ව්‍යාපෘතිය වැදගත් බව ලංකා විදුලි බල මණ්ඩලය පවසයි.

මෙම ව්‍යාපෘතිය අරණායක නාවලපිටිය ප්‍රදේශවල පිහිටුවන ජලාශ දෙකක්, කිලෝ මීටර් 2.5ක උමං මාර්ගයකින් සම්බන්ධ කර ක්‍රියාත්මක වන මහා පරිමාණ බලශක්ති ගබඩා කිරීමේ පද්ධතියකි.

මෙමගින් ශ්‍රී ලංකාව තීරණාත්මක ලෙස සුර්නජනනීය බලශක්තිය කරා යන පරිවර්තන ගමන, පොසිල ඉන්ධන මත යැපීම, අඩු කර වායු විමෝචනය සැලකිය යුතු ලෙස අවම කිරීමේ ඉලක්කය සපුරා ගනී.

ලංකා විදුලි බල මණ්ඩලය පැවසුවේ, ජාත්‍යන්තර සංවර්ධන හවුල්කරුවන් වෙත ව්‍යාපෘතියේ මූල්‍ය මාර්ග සිතියම් නිල වශයෙන් හඳුන්වා දුන් බව ය.

පාරිභෝගිකයින්ට දැරිය හැකි මිලක් සහතික කරමින් විදුලි ගාස්තු සඳහා වන බලපෑම් අවම කිරීම සඳහා ජාත්‍යන්තර ආයතනවලින් දිගුකාලීන අරමුදල් ලබා ගැනීම ලංකා විදුලිබල මණ්ඩලයෙහි අරමුණ වී තිබේ.