වාහන බදු අඩුකරලා නෑ – රජය කියයි

වාහන ආනයනයේදී බදු අඩු කිරීමට හෝ මිල අඩු කිරීමට රජය කිසිදු තීරණයක් ගෙන නොමැති බව මුදල් නියෝජ්‍ය අමාත්‍ය අනිල් ජයන්ත ප්‍රනාන්දු පවසයි.

ජනමාධ්‍ය හමුවේ අදහස් දක්වමින් නියෝජ්‍ය අමාත්‍යවරයා පැවසුවේ, පෙබරවාරි මාසයේ වාහන ආනයන සීමා ඉවත් කිරීමෙන් පසු බලාපොරොත්තු වූවාට වඩා ඉල්ලුම අඩු වුවහොත්, ශ්‍රී ලංකාව වාහන සඳහා බදු කපාහැරීමට ඉඩ ඇති බවට ජනමාධ්‍ය වාර්තා කර ඇති අතර, පශ්චාත් කැබිනට් මාධ්‍ය හමුවකදී තමා කළ ප්‍රකාශය එමගින් වැරදි ලෙස අර්ථකථනය කර ඇති බවයි.

ඒ අනුව, එම ප්‍රකාශය සම්බන්ධයෙන් පැහැදිලි කිරීමක් කරමින් නියෝජ්‍ය අමාත්‍ය අනිල් ජයන්ත ප්‍රනාන්දු කියාසිටියේ තමන් එම අවස්ථාවේදී ප්‍රකාශ කළේ, වාහන ඉල්ලුම සහ මිලදී ගැනීම හේතුවෙන් දේශීය වෙළෙඳපොළේ මිල ගණන්වල වෙනසක් සිදුවිය හැකි බව පමණක් බවයි.

වාහන ආනයන සීමා ලිහිල් කර ඇත්තේ සාමාන්‍ය වෙළඳපල තත්ත්වයන් යටතේ නොව සීමාවන් යටතේ බවත්, විශේෂයෙන්ම විදේශ විනිමය යටතේ බවද ඔහු වැඩිදුරටත් පැවසීය.

“ආනයනකරුවන්ට ආනයනය කිරීමට නිදහස ලබා දී ඇතත්, අනෙක් අතට, මේ සඳහා යොදවන විදේශ විනිමය මහ බැංකුව විසින් නිරීක්ෂණය කරනවා” ඔහු පැවසීය.

වාහන ආනයනය සඳහා ඉල්ලා ඇති ණයවර ලිපි (LC) සහ වෙළඳපල ක්‍රියාකාරිත්වය මත පදනම්ව විදේශ විනිමය මුදා හැරීම හෝ ක්‍රියාවලියේ යම් වෙනස්කමක් සිදුවන්නේ නම් එය මහ බැංකුව විසින් තීරණය කරනු ඇති බව ද නියෝජ්‍ය අමාත්‍ය අනිල් ජයන්ත ප්‍රනාන්දු පැවසීය.

“දේශීය වෙළඳපොලේ වාහන මිල වැඩි වී හෝ පහත වැටී තිබේද යන්න පිළිබඳව තවමත් නිශ්චිත තොරතුරු අප සතුව නැහැ” ඔහු වැඩිදුරටත් පැවසීය.

වාහන ආනයනය සම්බන්ධයෙන් වන ඕනෑම තීරණයක් රජය හෝ අදාළ රාජ්‍ය ආයතන විසින් නිල වශයෙන් ප්‍රකාශයට පත්කරන බව ඔහු ද ඔහු පැහැදිළි කළේය.

වාහන ආනයනයේදී බදු අඩුකළ බවට පළවන පුවත වැරදි බවත්, ඒ සම්බන්ධයෙන් නොමග නොයන ලෙසත් නියෝජ්‍ය අමාත්‍යවරයා ජනතාවගෙන් ඉල්ලා සිටියේය.