ලොහාන්ගේ බිරිඳ ආයෙත් ඇතුළට

හිටපු අමාත්‍ය ලොහාන් රත්වත්තේගේ බිරිඳ වන ශෂී ප්‍රභා රත්වත්තේ අද (22) නුගේගොඩ මහේස්ත්‍රාත් අධිකරණයට ඉදිරිපත් කිරීමෙන් පසු දෙසැම්බර් 02 වැනිදා දක්වා යළි රක්ෂිත බන්ධනාගාරගත කර තිබේ.

නොවැම්බර් 18 වැනිදා හිටපු අමාත්‍ය ලොහාන් රත්වත්තේ, දෙසැම්බර් 2 වැනිදා දක්වාත්, ඔහුගේ බිරිඳ නුගේගොඩ මහේස්ත්‍රාත් අධිකරණයට ඉදිරිපත් කිරීමෙන් පසු නොවැම්බර් 22 වැනිදා දක්වාත්, යළි රිමාන්ඩ් බන්ධනාගාරගත කිරීමට නියෝග කර ඇත.

නීතිවිරෝධී ලෙස ශ්‍රී ලංකාවට ගෙන්වා එකලස් කරන ලද සුඛෝපභෝගී මෝටර් රථයක් භාවිත කිරීමේ චෝදනාව මත ඔවුන් අත්අඩංගුවට ගත් අතර, නුගේගොඩ මහේස්ත්‍රාත් අධිකරණය විසින් මීට පෙර නොවැම්බර් 18 දක්වා රක්ෂිත බන්ධනාගාර ගත කර තිබිණි.

ලොහාන් රත්වත්තේගේ බිරිඳ වන ශෂී ප්‍රභා රත්වත්තේට අයත් මිරිහාන ඇඹුල්දෙණිය ප්‍රදේශයේ තෙමහල් නිවසක අංක තහඩු නොමැති සුඛෝපභෝගී මෝටර් රථයක් සම්බන්ධයෙන් පොලිස් මූලස්ථානයට ලැබුණු තොරතුරක් මත සිදුකළ පරීක්ෂාවකදී, අදාළ සුඛෝපභෝගී මෝටර් රථය සොයාගෙන තිබේ.

පරීක්ෂණවලදී ලොහාන් රත්වත්තේ සහ ඔහුගේ බිරිඳ යන දෙදෙනාම පොලිසියට පවසා ඇත්තේ ලොහාන්ගේ නැන්දම්මා එම නිවසේ පදිංචිව සිටින බවයි.

පසුගියදා මහනුවර කටුගස්තොට ප්‍රදේශයේදී වෙඩිවැදී මියගොස් සිටියදී සොයාගත් ලොහාන් රත්වත්තේගේ පෞද්ගලික ලේකම්වරයා විසින් මෝටර් රථය සති කිහිපයකට පෙර එහි ගෙනැවිත් තිබූ බව ඔවුන් කියා ඇත.