රයිසුයි – කොත්තුයි කන්න ආදි සිසුන් ඉස්කෝලෙ ලැප්ටොප් උස්සලා

මීගමුව, කටාන ප්‍රදේශයේ විදුහලක විදුහල්පතිගේ නිල කාමරය කඩා එහි තිබූ රුපියල් ලක්ෂ හතරක් පමණ වටිනා ලැප්ටොප් පරිගණක දෙකක් සොරාගෙන ඉන් එකක් උකස් කර ලබාගත් රුපියල් පහළොස් දාහක මුදලින් දින කිහිපයක් තිස්සේ ආපනශාලාවලට ගොස් කොත්තු රොටි සහ ප්‍රයිඩ් රයිස් කෑවැයි කියන ආදි සිසුන් දෙදෙනෙක් කටාන පොලිසියේ අපරාධ විමර්ශන අංශයේ නිලධාරී කණ්ඩායමක් විසින් පෙරේදා (27) අත්අඩංගුවට ගනු ලැබූහ. අත්අඩංගුවට ගත් අවුරුදු දහ අටක සහ අවුරුදු දාහතක වයසේ පසු වන ආදි සිසුන් දෙදෙනාගෙන් ප්‍රශ්න කර හෙළිකර ගත් තොරතුරු මත උකස් කරන ලද පරිගණකය සහ අනෙක් ලැප්ටොප් පරිගණකය සොයාගත් බව පොලිසිය සඳහන් කරයි.

පසුගිය සෙනසුරාදා රාත්‍රී කාලයේ මෙම ආදි සිසුන් දෙදෙනා විදුහල් භූමියට හොර රහසේ ඇතුළු වී එහි දොරක් කඩා පසුව විදුහල්පති නිල කාමරයට එහි කවුළුවකින් ඇතුළු වී මෙම පරිගණක දෙක සොරාගෙන ගොස් ඇතැයි පොලිසිය පැවැසීය.විදුහල් භූමියට ඇතුළු වූ මෙම ආදි සිසුන් දෙදෙනා විදුහලේ සවිකර ඇති ප්‍රධාන ස්විචය අක්‍රිය කර එහි සවිකර ඇති සී .සී .ටී.වී. කැමරාවල ක්‍රියාකාරිත්වය අඩපණ කර මේවා සොරකම්කර තිබෙන බව පොලිසිය කියයි.

එහෙත් මෙම සැකකාර ආදි සිසුන් දෙදෙනා විදුහල් භූමියට ඇතුළු වන ආකාරය සී.සී.ටී.වී කැමරාවල රූප රාමු පරීක්ෂා කර බැලීමේදී දක්නට ලැබුණු බව පොලිසිය සඳහන් කරයි. කැමරාවලට සවි කර තිබූ වයර් ද කපා දමා තිබෙන බව පොලිසිය පවසයි.

විදුහලෙන් කරන ලද පැමිණිල්ලක් අනුව විමර්ශන පවත්වා හෙළිවූ තොරතුරු මත මෙම දෙදෙනා අත්අඩංගුවට ගනු ලැබූහ. එක් පරිගණකයක් උකස් කර ලබාගත් රුපියල් පහළොස් දහයේ මුදල වැයකර වරින් වර ප්‍රයිඩ් රයිස් සහ කොත්තු රොටි කෑ බවත් අනෙක් පරිගණකය ද උකස් කර ලබාගන්නා මුදල්වලට ෆ්‍රයිඩ් රයිස් සහ කොත්තු රොටි කෑමට සූදානම්ව සිටි බවත් අත්අඩංගුවට ගත් සැකකරුවන් දෙදෙනා පොලිස් ප්‍රශ්න කිරීම්වල දී පවසා ඇතැයි කියති.අත්අඩංගුවට ගත් එක් සැකකරුවකු සුපිරි වෙළෙඳසලකින් ඇඳුම් කට්ටලයක් මිලදීගෙන ඇතැයි ද පොලිසිය කියයි.

ශ්‍රීනාත් ප්‍රසන්න ජයසූරිය