මෙම රජය භාරගත්තේ බරපතල වෙනස්කම් එක රැයකින් සිදු කිරිමට හැකි රටක් නොවන බව අමාත්‍ය වෛද්‍ය නලින්ද ජයතිස්ස පවසනවා.
ජාතික ජන බලවේගය විසින් ඉදිරිපත් කරන ලද ප්‍රතිපත්ති ප්‍රකාශයේ ඇතැම් කරුණු පියවරෙන් පියවර සිදුකරන ඒවා බවත්, ආණ්ඩුව පත්වී තවම ගතවී ඇත්තේ මාස 06 ක් පමණක් බවයි ඊයේ (28) දෙරණ 360 වැඩසටහනට එක්වෙමින් අමාත්‍යවරයා සඳහන් කළේ.
මේ වනවිට රට ක්‍රමානුකූලව හුස්ම ගැනීමට පටන්ගෙන ඇති බවත්, ප්‍රතිපත්ති ප්‍රකාශයේ ඇති කරුණු ඉටු කරමින් පවතින බවත්, ඒ සම්බන්ධයෙන් කලබලයට පත් නොවිය යුතු බවත්, රට භාරදී ඇත්තේ මාස 60 කට බවත් ඔහු ප්‍රකාශ කළා.
ජනතාවට වඩාත් සහන ලබාදීමට හැකි නම් රජය කැමති බවද සියලුම අධ්‍යාපන උපකරණවල වැට් බද්ද අඩු කරන බවට රජය ප්‍රකාශ කළ අතර, එය සිදු කිරිමට නොහැකි වූ බවට විපක්ෂය කරන චෝදනා සත්‍ය බවද, එහෙත් දරුවන් ලක්ෂ 16 කට පොත්පත් මිලදී ගැනීමට රුපියල් 6000 බැගින් ලබාදී ඇති බවද අමාත්‍යවරයා පවසා සිටියා.
ආණ්ඩුව මැනිය යුත්තේ මාස 04 කින් එහාට බවත්, මෙම මාස හතරට තම ආණ්ඩුව බරපතල වරදක් සිදුකර නොමැති බවයි අමාත්‍ය වෛද්‍ය නලින්ද ජයතිස්ස වැඩිදුරටත් ප්‍රකාශ කර සිටියේ.
