ශ්‍රී ලංකා ඔලිම්පික් කමිටුවේ ලේකම් මැක්ස්වල් ද සිල්වාගේ කටයුතු අත්හිටුවීමේ වාරණ නියෝගයක් නිකුත් කරන ලෙස ඉල්ලා ගොනුකර ඇති පෙත්සම මේ මස 18 වැනිදා යළි කැඳවන ලෙස කොළඹ දිසා අධිකරණය අද නියෝග කළේය.
ශ්‍රී ලංකා පාපැදී සම්මේලනයේ හිටපු ලේකම් නලින් අධිකාරී ආරච්චිගේ සහ ශ්‍රී ලංකා අත්පන්දු සම්මේලනයේ සභාපති උපාලි රාජපක්ෂ විසින් මෙම පෙත්සම ඉදිරිපත් කර තිබිණි.
මෙම පෙත්සම අද කැඳවනු ලැබූ අවස්ථාවේදී එහි ඇතැම් වගඋත්තරකරුවන් වෙනුවෙන් පෙනීසිටි නීතිඥවරු අධිකරණය හමුවේ ඉල්ලීමක් කරමින් විරෝධතා ගොනුකිරීම සඳහා තමන්ට තව දුරටත් කාලය ලබාදෙන ලෙස ඉල්ලා සිටියහ.
ඒ අනුව, නඩුව යළි මේ මස 18 වැනිදා කැඳවීමට නියෝග කළ දිසා අධිකරණය, එදිනට පෙර විරෝධතා සහ ඊට අදාළ ලිඛිත දේශන තිබේ නම් ඉදිරිපත් කරන ලෙස පාර්ශවකරුවන්ට නියෝග කළේය.
