කල්පිටිය ප්‍රාදේශීය සභාවේ සභාපති අබ්දුල් සත්තාර් මොහොමදු රික්කාස් ඉලක්ක කර ගනිමින් ඊයේ (ජූනි 16) රාත්‍රියේ මදුරන්කුලිය, විරුතෝඩේ ප්‍රදේශයේදී දරුණු ප්‍රහාරයක් එල්ල වී තිබේ. මෙම සිදුවීම පිටුපස දේශපාලන කුමන්ත්‍රණයක් හෝ දේශපාලන පළිගැනීමක් තිබේද යන්න පිළිබඳව දැඩි සැකයක් මතුව ඇතැයි ප්‍රාදේශීය ආරංචි මාර්ග පවසයි.
මදුරන්කුලිය පොලීසිය වාර්තා කරන්නේ, සභාපතිවරයා ඇතුළු පිරිසක් ගමන් කරමින් සිටි මෝටර් රථයකට පිරිසක් විසින් පහර දී ඇති බවයි. මෙම ප්‍රහාරයෙන් සභාපතිවරයාට පහර දී ඇති අතර, ඔහුගේ වාහනයට බරපතල අලාභ හානි සිදු වී තිබේ.
මෙම සිදුවීමේ ආන්දෝලනාත්මක කරුණක් වන්නේ, සභාපතිවරයා ජාතික ජන බලවේගය පක්ෂයේ පුත්තලම දිස්ත්‍රික් පාර්ලිමේන්තු මන්ත්‍රී මොහොමඩ් පයිසාල් මහතාගේ නිවසට පැමිණ, ආපසු නොරොච්චෝලය බලා විරුතෝඩේ හරහා ගමන් කරමින් සිටියදී මෙම ප්‍රහාරයට ලක්වීමයි. ප්‍රහාරය එල්ල වී ඇත්තේ දේශපාලනඥයෙකුගේ නිවසින් පිටවන අවස්ථාවේදීම වීම මෙම සිදුවීමේ දේශපාලන පසුබිම පිළිබඳව ප්‍රබල ප්‍රශ්න මතු කරයි.
සිද්ධිය සම්බන්ධයෙන් සභාපතිවරයා විසින් මදුරන්කුලිය පොලීසියට පැමිණිල්ලක් ඉදිරිපත් කර ඇත. ප්‍රදේශයේ උණුසුම් තත්ත්වය සැලකිල්ලට ගනිමින්, ආරක්ෂාව තහවුරු කිරීම සඳහා පොලිස් විශේෂ කාර්ය බළකාය (STF) යෙදවීමට කටයුතු කර තිබේ.
