පාර්ලිමේන්තු කාර්ය මණ්ඩලයේ ඉල්ලීමක් සලකා බලමින්, කාර්ය මණ්ඩලය සඳහා අය කරන ආහාර මිල ගණන් නැවත සංශෝධනය කිරීමට පාර්ලිමේන්තු ගෘහ කාරක සභාව තීරණය කර තිබේ. මෙම තීරණය ගනු ලැබුවේ, කාරක සභාවේ සභාපති, කථානායක වෛද්‍ය ජගත් වික්‍රමරත්න මහතාගේ ප්‍රධානත්වයෙන් ඊයේ (ජූනි 20) පාර්ලිමේන්තුවේදී රැස්වූ අවස්ථාවේදීය.
පාර්ලිමේන්තු ගෘහ කාරක සභාව 2025 මැයි 23 දින ගත් තීරණයකට අනුව, 2025 ජූනි 01 දින සිට ක්‍රියාත්මක වන පරිදි, විධායක ශ්‍රේණියේ නිලධාරියෙකු සඳහා මාසිකව රුපියල් 4,000ක්ද, විධායක නොවන කාර්ය මණ්ඩල සාමාජිකයෙකු සඳහා මාසිකව රුපියල් 2,500ක්ද ආහාර සඳහා අය කිරීමට නියමිතව තිබුණි.
කෙසේ වෙතත්, මෙම මිල ගණන් නැවත සංශෝධනය කරන ලෙස පාර්ලිමේන්තු කාර්ය මණ්ඩලය විසින් කරන ලද ඉල්ලීම් කාරක සභාවේදී දීර්ඝ ලෙස සලකා බැලුණි. ඒ අනුව, විධායක ශ්‍රේණියේ නිලධාරියෙකු සඳහා මාසිකව රුපියල් 3,000ක්ද, විධායක නොවන කාර්ය මණ්ඩල සාමාජිකයෙකු සඳහා මාසිකව රුපියල් 2,000ක්ද වශයෙන් අය කිරීමට මෙහිදී තීරණය කෙරිණි. මෙම නව මිල ගණන් එළඹෙන ජූලි මස 01 දින සිට ක්‍රියාත්මක වීමට නියමිතය.
පසුගිය මැයි 23 දින ගත් තීරණය පරිදි, පාර්ලිමේන්තු මහජන භෝජනාගාරයෙන් ආහාර මිලදී ගන්නා ගරු මන්ත්‍රීවරුන්ගේ රියදුරන්, පොලිස් නිලධාරීන්, ජනාධිපති/අග්‍රාමාත්‍ය ආරක්ෂක අංශ නිලධාරීන් සහ මාධ්‍යවේදීන්ගෙන් දැනට අය කරනු ලබන ආහාර ගාස්තු තවදුරටත් නොවෙනස්ව පවතිනු ඇතැයිද කාරක සභාව තීරණය කර තිබේ
