පාර්ලිමේන්තුවේ විශේෂ රැස්වීමක් අද (14) පැවැත්වේ.
පළාත් පාලන ආයතන ඡන්ද විමසීම් (විශේෂ විධිවිධාන) පනත් කෙටුම්පතට අදාළව ශ්‍රේෂ්ඨාධිකරණය ගොනු කර ඇති පෙත්සම්වල තීරණය කතානායකවරයා විසින් පාර්ලිමේන්තුවට දැනුම් දීමට මෙම විශේෂ රැස්වීම පැවැත්වීමට නියමිතය.
පාර්ලිමේන්තුවේ ස්ථාවර නියෝග 16හි විධිවිධාන ප්‍රකාරව අග්‍රමාත්‍යවරිය විසින් කතානායකවරයාට කළ ඉල්ලීමකට අනුව මෙම රැස්වීම පැවැත්වේ.
ඒ අනුව අද අදාළ පනත් කෙටුම්පත සලකා බැලීම සඳහා අදාළ අමාත්‍යාංශයීය උපදේශක කාරක සභාව ද රැස්වීමට නියමිත ය.
මෙම පනත් කෙටුම්පතට අදාළ දෙවන වර කියැවීමේ විවාදය එළැඹෙන 17 වන දා සවස 2:00 සිට 7:00 දක්වා පැවැත්වීමට ද පාර්ලිමේන්තු කටයුතු පිළිබඳ කාරක සභාවේදී තීරණය කර තිබේ.
