තැපැල් කාර්යාල මගින් ඡන්ද කාඩ් බෙදීම ඊයේ සිට අරඹයි

මහමැතිවරණයට අදාළ නිල ඡන්ද දැන්වීම් පත්‍රිකා තැපැල් කාර්යාල 2090ක් මගින් තැපැල් සේවකයන් 8000ක් පමණ යොදවා ඊයේ (27දා) සිට බෙදාහැරීම් ආරම්භ කළ බව නියෝජ්‍ය තැපැල්පති රාජිත රණසිංහ මහතා ඊයේ (27දා) පැවසීය. කොළඹ දිස්ත්‍රික්කයට අදාළ පත්‍රිකා ඊයේ (27දා) වනතෙක් ලැබී නැතැයි ද ඒ මහතා කීය.

නිල ඡන්ද දැන්වීම් පත්‍රිකා සමග අදාළ දිස්ත්‍රික්කයට තරග කරන දේශපාලන පක්ෂ හා ස්වාධීන කණ්ඩායම්වල අපේක්ෂකයන්ගේ නම් සහ මනාප අංක ඇතුළත් පත්‍රිකා ද බෙදාහැරීමට කටයුතු කරන බව රණසිංහ මහතා කීය.

නිල ඡන්ද දැන්වීම් පත්‍රිකා සමග පක්ෂවල සහ ස්වාධීන කණ්ඩායම්වල පත්‍රිකා ද නොවැම්බර් 07 වැනිදා තෙක් බෙදාහරින බවත් ඊයේ දිනයේ මෙන් එම පත්‍රිකා පමණක් බෙදාහැරීම නොවැම්බර් 03 වැනිදා (ඉරිදා) දක්වා සිදුකරන බවත් ඒ මහතා කීය. එය පෙරවරු 8.00 සිට පස්වරු 6.00 දක්වා සිදුකරන බවත් ඔහු කීය.

එම දිනවලදී කිසියම් අයකුට නිල ඡන්ද දැන්වීම් පත්‍රිකා ලබාගැනීමට නොහැකි වුවහොත් තමන්ට ආසන්න තැපැල් හලට නොව තැපැල් කටයුතු සිදුකරන තැපැල් හලට ගොස් සිය අනන්‍යතාව හෙළිකර නොවැම්බර් 14 වැනිදා තෙක් නිල ඡන්ද දැන්වීම් පත්‍රිකා ලබාගත හැකි බව ද ඔහු කීය. මෙම පත්‍රිකා ලියුම් පෙට්ටිවලට දැමීමක් සිදුනොකරන බවත් ගෘහයේ සිටින අයකු ලේඛනයකට අත්සන් තබා එම පත්‍රිකා ලබාගත යුතු බවත් ඒ මහතා කීය.

මේ වනවිට මහමැතිවරණයට අදාළව පැවැති තැපැල් ඡන්දයේ රක්ෂිත පැකට්වලින් සියයට 57ක් සහකාර මැතිවරණ භාර නිලධාරීන්ට භාරදී ඇති බවත් ඉතිරි රක්ෂිත පැකට් ඉදිරි දින කිහිපය තුළ භාරදෙන බවත් ඒ මහතා කීය.