ඕස්ට්‍රේලියානු ව්‍යාපාරිකයෙකුගේ සමාගමක කොටස් ව්‍යාජ ඇටර්නි බලපත්‍රයක් මත විකුණා රුපියල් මිලියන 21 ක් කොල්ලකෑමේ චෝදනාවට ලක් වූ හිටපු අමාත්‍ය උදය ගම්මන්පිල සහ ව්‍යාපාරික සිඩ්නි ජයසිංහ යන දෙදෙනා අද (24) කොළඹ මහාධිකරණය විසින් නිදොස් කොට නිදහස් කරන ලදී.
දීර්ඝ නඩු විභාගයකින් පසු කොළඹ මහාධිකරණ සභාපති විනිසුරු නාමල් බණ්ඩාර බලල්ලේ විසින් මෙම තීරණය ගන්නා ලදී.
විත්තිකරුට එරෙහි චෝදනා සාධාරණ සැකයකින් තොරව ඔප්පු කිරීමට පැමිණිල්ල අපොහොසත් වී ඇති බැවින් විත්තිකරුවන් නිදොස් කොට නිදහස් කරන බව ද විනිසුරුවරයා ප්‍රකාශ කළේය.
1996 සැප්තැම්බර් 26 වන දින සිට 1997 සැප්තැම්බර් 25 දක්වා කාලය තුළ ව්‍යාජ ඇටර්නි බලපත්‍රයක් සකස් කර ඩිජිටල් නොමිනීස් ප්‍රයිවට් ලිමිටඩ් විසින් මිලදී ගෙන තිබූ ඕස්ට්‍රේලියානු ව්‍යාපාරික බ්‍රයන් ෂැඩික්ට අයත් පෞද්ගලික බැංකුවක කොටස් මිලියන 21 ක් විකිණීමෙන් රුපියල් මිලියන 21 ක් අයථා ලෙස පරිහරණය කළ බවට චෝදනා කරමින් නීතිපතිවරයා විසින් පසුගිය යහපාලන රජය සමයේ හිටපු අමාත්‍ය උදය ගම්මන්පිල සහ ව්‍යාපාරික සිඩ්නි ජයසිංහ යන අයට එරෙහිව මෙම නඩුව ගොනු කර තිබුණි.
