යුක්රේනයේ අගනුවර වන කියෙව් ඉලක්ක කර ගනිමින් රුසියාව විසින් එල්ල කරන ලද අති විශාල ඩ්‍රෝන සහ මිසයිල ප්‍රහාර 100කට අධික ප්‍රමාණයක් මේ වන විට ජාත්‍යන්තරයේ දැඩි කම්පනයට හා ආන්දෝලනයට තුඩු දී ඇත. මාධ්‍ය වාර්තා පෙන්වා දෙන්නේ මෙම ප්‍රහාර හමුදා ඉලක්ක ඉක්මවා ගොස්, සිවිල් වැසියන්ට ද බලපෑම් එල්ල කර ඇති බවයි.
රුසියාවේ මෙම අසීමිත ප්‍රහාර හමුවේ මේ වන විට පුද්ගලයන් පස් දෙනෙකුට දිවි අහිමි වී ඇති අතර, අසූවකට අධික පිරිසක් තුවාල ලබා රෝහල් ගත කර තිබේ. කියෙව් නගරය පුරා දැවැන්ත පිපිරීම් සහ ගිනිගැනීම් වාර්තා වන අතර, නගර වැසියන් දහස් ගණනක් තම ජීවිත බේරා ගැනීම සඳහා භූගත නවාතැන්වල රැඳී සිටිති.
යුක්රේන බලධාරීන් පෙන්වා දෙන්නේ රුසියාව හමුදා ස්ථාන ඉලක්ක කළ බව පැවසුවද, මෙම ප්‍රහාර සිවිල් ප්‍රදේශවලට ද බලපෑම් එල්ල කර ඇති බවයි. යුක්රේන විදේශ කටයුතු අමාත්‍යාංශය මෙම ප්‍රහාර දැඩිව හෙළා දකින අතර, මෙය යුද අපරාධයක් ලෙස හැඳින්විය හැකි බවට ද ඉඟි පළ කර ඇත.
