ඒ වීඩියෝ එක බොරු-ඒක හදපු එකක් – අනූ-කනූ CID යට කියයි

මෙරට සමාජ මාධ්‍ය ඔස්සේ ජනප්‍රිය චරිත දෙකක් වන ප්‍රකට අනුෂ්කි ප්‍රේමචන්ද්‍ර සහ කනුෂ්කි ප්‍රේමචන්ද්‍ර ඔවුන් හා සම්බන්ධ කෘත්‍රිම බුද්ධිය (AI) මගින් ජනනය කරන ලදැයි කියන වීඩියෝවක් සම්බන්ධයෙන් නීතිමය ක්‍රියාමාර්ග ආරම්භ කර තිබේ.

මේ සම්බන්ධයෙන් පැමිණිල්ලක් ගොනුකිරීම සඳහා ඔවුහු අපරාධ පරීක්ෂණ දෙපාර්තමේන්තුවට (CID) පැමිණියහ.

එහිදී ජනමාධ්‍ය වෙත අදහස් දක්වමින් අනුෂ්කි ප්‍රේමචන්ද්‍ර සහ කනුෂ්කි ප්‍රේමචන්ද්‍ර ප්‍රකාශ කළේ, ඔවුන් හා සම්බන්ධ AI මගින් නිර්මාණය කරන ලද වීඩියෝවක් සමාජ මාධ්‍යවල සැරිසරන බවයි.

“අපි ගැන AI මගින් හදපු වීඩියෝවක් සමාජ මාධ්‍යවල සංසරණය වෙමින් තියෙනවා. මීට පෙරත් මෙවැනි වීඩියෝවක් හුවමාරු වුණා. මෙය අඛණ්ඩව සිදුවෙමින් පවතිනවා. එය සිදුකරනු ලබන්නේ එකම කණ්ඩායමක් විසින්” යනුවෙන් ඔවුන් එහිදී ප්‍රකාශ කර ඇත.

අනුෂ්කි ප්‍රේමචන්ද්‍ර සහ කනුෂ්කි ප්‍රේමචන්ද්‍ර කියාසිටියේ, මෙම වීඩියෝව බෙදාහැරීම පිටුපස සිටින අය අත්අඩංගුවට ගැනීමට අපරාධ පරීක්ෂණ දෙපාර්තමේන්තුව කටයුතු ආරම්භ කර ඇති අතර, විවිධ සමාජ මාධ්‍ය වේදිකාවල වීඩියෝව හුවමාරු කරන වෙනත් පුද්ගලයන්ට එරෙහිව ද පියවර ගැනීමට නියමිත බවයි.

කඳුළු සලමින් ඔවුන් දෙදෙනා ප්‍රකාශ කළේ, තමන් දැඩි හිරිහැරවලට ලක්වන බැවින් නීතිමය ක්‍රියාමාර්ග ගැනීමට සිදු වූ බවත්, කාන්තාවන්ට මෙලෙස පහරදීමෙන් වළකින ලෙස ජනතාවගෙන් ඉල්ලා සිටින බවත්ය