ඊශ්‍රායලය ‘අයන් ඩෝම්’ වෙනුවට ‘අයන් බීම්’ ගෙනෙයි

ඊශ්‍රායලය විසින් තම ගුවන් කලාපය ආරක්ෂා කිරීම වෙනුවෙන් නව මිසයිල ආරක්ෂක පද්ධතියක් නිර්මාණය කරමින් පවතින බවට විදෙස් මාධ්‍ය වාර්තා කරයි.

‘අයන් බීම්’ ලෙස නම්කර ඇති මෙම මිසයිල ආරක්ෂක පද්ධතිය වර්තමානයේ ඊශ්‍රායලය භාවිත කරන අයන් ඩෝම් මිසයිල ආරක්ෂක පද්ධතියට වඩා ඉහළ කාර්යක්ෂමතාවයකින් යුක්ත බවයි වාර්තා වන්නේ.

අධිබලැති ලේසර් කිරණ භාවිත කරමින් ප්‍රහාර එල්ල කළ හැකි මෙම ආරක්ෂක පද්ධතිය මඟින් සතුරු මිසයිල, ගුවන් යානා, ඇතුළු ගුවනින් සිදුකරන ආක්‍රමණවලට ක්ෂණිකව ප්‍රතිචාර දැක්වීමේ හැකියාව පවතින බව වැඩිදුරටත් වාර්තා වේ.

ඇමරිකානු ඩොලර් මිලියන 500කට වැඩි පිරිවැයක් දරමින් මෙම නව නිර්මාණය සිදුකරනු ලබන්නේ අයන් ඩෝම් මිසයිල ආරක්ෂක පද්ධතිය නිර්මාණය කළ නිර්මාණකරුවන් බව විදෙස් වාර්තා වැඩිදුරටත් සඳහන් කරයි.

වසරක් තුළ මෙම නව මිසයිල ආරක්ෂක පද්ධතිය හඳුනවාදීමට කටයුතු කරන බව පැවසූ ඊශ්‍රායල ආරක්ෂක අමාත්‍යාංශය, මෙය යුද්ධයේ නව යුගයක් බවයි පවසා සිටියේ.

මෙම නව මිසයිල ආරක්ෂක පද්ධතියට මීටර් සිය ගණනක සිට කිලෝමීටර් කිහිපයක් දක්වා ආලෝකයේ වේගයෙන් ගමන් කිරීමේ හැකියාවක් පවතින බවයි වාර්තා වන්නේ.

එමෙන්ම යුද්ධයේ දී අයන් ඩෝම් මිසයිල ආරක්ෂක පද්ධතිය ක්‍රියාත්මක කිරීමට වැයවන පිරිවැයට වඩා අඩු පිරිවැයක් ‘අයන් බීම්’ මිසයිල ආරක්ෂක පද්ධතිය ක්‍රියාත්මක කිරීමේ දැරීමට සිදුවනවා.