අපනයන ණය රක්‍ෂණ සංස්ථාවේ ලොක්කෝ අනිවාර්ය නිවාඩු යවලා

46 වැනි සංවත්සරය සමරන ශ්‍රී ලංකා අපනයන ණය රක්‍ෂණ සංස්ථාවේ පසුගිය වසර 12 තුළ සිදුව ඇති දූෂණ හා අක්‍රමිකතා හේතුවෙන් විනාශ වූ එම ආයතනය ප්‍රතිසංස්කරණය කිරීමේ භාරදූර කාර්යය එහි නව කළමනාකාරීත්වයට පැවරී තිබේ.

එම රාජ්‍ය සංස්ථාවේ සිදුව ඇතැයි කියන මූල්‍ය අවභාවිතය පිළිබඳ විමර්ශනය කිරීම සඳහා පසුගිය පාර්ලිමේන්තුවේ දී පොදු ව්‍යාපාර පිළිබඳ පාර්ලිමේන්තු කාරක සභාව හෙවත් කෝප් කමිටුව විසින් වෝහාරික විගණනයක් ද සිදු කෙරිණි.

පාර්ලිමේන්තු ආරංචි මාර්ගවලට අනුව කෝප් කමිටුවට අතුරු වාර්තාවක් ඉදිරිපත් කර ඇති අතර, ඉන් අනතුරුව අක්‍රමිකතා රැසකට චෝදනා එල්ල වූ එහි සාමාන්‍යාධිකාරීවරයා අනිවාර්ය නිවාඩු යවා තිබේ.

එක් අපනයනකරුවකුට රුපියල් මිලියන 400කට අධික රක්ෂණ වන්දි මුදලක් සම්මත ක්‍රමවේදයන්ට පටහැනිව කර ඇති ආන්දෝලනාත්මක ගෙවීමක් සම්බන්ධයෙන් ද විමර්ශනයක් ආරම්භ කර තිබේ.

ශ්‍රී ලංකා අපනයන ණය රක්‍ෂණ සංස්ථාව විසින් ඍජු අපනයනකරුවන්ට සහ වක්‍ර අපනයනකරුවන්ට ඔවුන්ගේ අවදානම් අවම කර ගැනීම සඳහා පෙර සහ පසු නැව්ගත කිරීමේ ඇපකර ඇතුළුව ණය රක්ෂණ සහ මූල්‍ය සේවා සපයයි.

දූෂිත ක්‍රියා සිදුකිරීමේදී සාමාන්‍යාධිකාරීවරයාට සහාය වූ බවට චෝදනා එල්ල වූ ඇතැම් නිලධාරීන් නිදහස් කරමින් භාණ්ඩාගාරය අතිරේක පරීක්ෂණ දෙකක් පවත්වා ඇත.

ශ්‍රී ලංකා අපනයන ණය රක්‍ෂණ සංස්ථාවේ නිලධාරීන් විසින් ඉදිරිපත් කරන ලද විමර්ශන වාර්තාවේ 2006 සිට නිලයේ සිටි සාමාන්‍යාධිකාරීවරයා විසින් ඇති කරන ලද පරිපාලන ගැටලු රාශියක් විස්තර කර ඇත.

අක්‍රමවත් බඳවා ගැනීම්, ප්‍රතිරක්ෂණ ප්‍රතිපත්ති ක්‍රියාත්මක කිරීමට අපොහොසත් වීම, නිලධාරීන් සඳහා රාජකාරි ලැයිස්තු නොමැතිකම, අසමාන සැළකීම, සුබසාධන පහසුකම් අඩු කිරීම සහ ආයතනයේ ක්‍රියාකාරීත්වය අඛණ්ඩව පහත වැටීම ඊට ඇතුළත්ය.

මීට අමතරව, සංස්ථාවේ මූල්‍ය අක්‍රමිකතා සමාලෝචනය කිරීම සඳහා අමාත්‍යාංශයේ අභ්‍යන්තර විගණක ඇතුළු ස්වාධීන කමිටුවක් පිහිටුවන ලෙස කෝප් කමිටුව මුදල් අමාත්‍යාංශයට උපදෙස් දී තිබේ.

සාමාන්‍යාධිකාරීවරයාගේ ක්‍රියාකලාපය පිළිබඳ වෙනම පරීක්ෂණයක් ද නියම කර ඇත.

සිදුකෙරෙන විමර්ශනයේදී දූෂණ සිද්ධීන් කිහිපයක් අනාවරණ වී තිබේ.

රක්ෂණ ඔප්පුවේ ලැයිස්තුගත කර නොමැති රටකට අපනයන නැව්ගත කිරීමක් අනවසරයෙන් අනුමත කළ අලෙවිකරණ අංශයේ සේවකයකු සම්බන්ධ වූ අවස්ථාව එක් වැදගත් සිද්ධියකි.