අනුරාධපුරේ හොර හිඟන්නෝ අල්ලයි

වෛද්‍ය අවශ්‍යතා සහ හදිසි අවස්ථා ආදී විවිධ හේතුවලට මුවා වී අනුරාධපුර පුදබිමේ වන්දනාකරුවන්ගෙන් මුදල් හිඟාකන ව්‍යාජ පුද්ගලයන්ට එරෙහිව දැඩි ක්‍රියාමාර්ග ගැනීමට අනුරාධපුර පොලිසිය තීරණය කර තිබේ.

එලෙස හිඟා කෑ කාන්තාවන් හය දෙනෙකු අත්අඩංගුව ගැනීමට ද කටයුතු කර ඇත.

ලැබුණු පැමිණිලි රැසකට අනුව අනුරාධපුර උඩමළුව පොලිසියේ නිලධාරීන් යාචකයන් සොයා ජය ශ්‍රී මහා බෝධීන් වහන්සේ සහ රුවන්වැලිසෑය පුදබිම් ආශ්‍රිතව හදිසි වැටලීමක් සිදුකර තිබේ.

එහිදී වන්දනාකරුවන් පසුපස යමින් සිටි මෙම කාන්තාවන් 6 දෙනා අත්අඩංගුවට ගෙන ඇත.

අත්අඩංගුවට ගත් කාන්තාවන් අක්ෂි ශල්‍යකර්ම සඳහා මුදල් එකතු කිරීම, වකුගඩු රෝගවලට ප්‍රතිකාර කිරීම සහ ඉන්දියාවේ වන්දනාවේ යෑම සඳහා වැනි අමුතු අරමුණු සඳහා පවා සිඟමන් යදිමින් සිට ඇති බව උඩමළුව පොලිසියේ ස්ථානාධිපති ප්‍රධාන පොලිස් පරීක්ෂක ඩබ්ලිව්.සී.එල්.ආර්.බී.කේ.වෑත්තෑව පවසයි.

මුදල් ලබා දෙනතුරු යාචකයන් ආගමික ස්ථානවලට යෑමට බාධා කරන නිසා සිදුවන කරදරවලට එරෙහිව දෙස් විදෙස් වන්දනාකරුවන්ගෙන් පැමිණිලි රැසක් ලැබී ඇති බව ස්ථානාධිපතිවරයා පවසා තිබේ.

මෙලෙස අත්අඩංගුවට ගෙන ඇත්තේ දේවානම්පියතිස්ස පුර, වෙස්සගිරිය, තිසාවැව, ජයන්ති මාවත සහ කොරකහවැව ආදී ප්‍රදේශවල පදිංචි වයස අවුරුදු 51ත් 80ත් අතර වයස්වල පසුවන කාන්තාවන්ය.

ඉදිරි කටයුතු සඳහා උඩමළුව පොලිසිය විසින් ඔවුන් අනුරාධපුර මූලස්ථාන පොලිසිය වෙත භාර දීමට කටයුතු කර තිබේ.