පාට, පක්ෂ, කුල, පන්ති භේදයෙන් තොරව අසහනයට පත්වී ඇති රටේ ජනතාව තමන්ගේ පවුලේ සාමාජිකයන් සේ සළකා බලාගන්නා බව විපක්ෂ නායක සජිත් ප්‍රේමදාස මහනුවර ජනාධිපතිවරණ ප්‍රචාරක රැළියේදී ඊයේ (09) පැවසීය.
අද වනවිට ජනතාව දරුණු ඛේදවාචකයකට මුහුණදී ඇති බවත් උග්‍ර පොහොසතුන් සැප සම්පත් විඳින අතරේ බහුතර දුප්පතුන් අසහනයට පත්වී ඇති බව විපක්ෂ නායකවරයා අවධාරණය කළේ ය.
ලක්ෂ දෙසිය විස්සක් ජනතාව දුකින් මුදාගන්නා බව ත් සෑම පැත්තකින් ම අසහනයට පත්වී ඇති ජනතාව තමාගේ පාලනයක් යටතේ බලාගන්නා බව ත් විපක්ෂ නායකවරයා පැවසීය .
අනුප්‍රාප්තික ජනාධිපතිවරයා යටතේ රටේ ජනතාව අන් කවරදාටත් වඩා දුප්පත් බවට පත්වී ඇති බව විපක්ෂ නායකවරයා සඳහන් කළේ ය.
සෑම දිස්ත්‍රික් ලේකම් කොට්ඨාසයකට ම කර්මාන්තශාලාවක් ඇති කරන බවත් නව රැකියා සහ ව්‍යවසායකයන් මිලියනයක් ඇතිකර රට දුප්පත්කමෙන් ඉවත් කර ජනතාවගේ දුක නැති කර රට සුඛිත මුදිත කරන බව ත් විපක්ෂ නායකවරයා පැවසීය.
සීමාසහිත කාලයකට රාජ්‍ය මැදිහත්වීම මත දුප්පත් ජනතාවට ජනසවිය, අස්වැසුම වැනි ක්‍රම අධ්‍යයනය කර වසර දෙකක් මුදල් ලබාදෙන වැඩසටහනක් අලුතෙන් ම ආරම්භ කරන බව ත් ජනාධිපතිධූර අපේක්ෂක, විපක්ෂ නායක සජිත් ප්‍රේමදාස ජන රැළිය අමතමින් වැඩිදුරට ත් කීවේ ය.
