ස්වාධීන සහ අපක්ෂපාතී යුක්තිය පසිඳලීමේ තීරකවරියක් ලෙස රටේ අධිකරණයේ අඛණ්ඩතාව, ස්වාධීනත්වය සහ අභිමානය ආරක්ෂා කිරීමට සිය නොසැලෙන කැපවීම ලබාදෙන බව ප්‍රකාශ කරමින්, අභිනව අගවිනිසුරුවරිය ලෙස පත් වූ ජනාධිපති නීතිඥ මුර්දු ප්‍රනාන්දු ඊයේ ප්‍රතිඥා දුන්නාය.
අගවිනිසුරු මුර්දු ප්‍රනාන්දු මෙම අදහස් පළකළේ මෙරට 48 වැනි අගවිනිසුරුවරිය ලෙස ඇය පිළිගැනීම සඳහා ශ්‍රේෂ්ඨාධිකරණයේදී පැවැති උත්සවය අමතමිනි.
ආචාර්ය ශිරාණි බණ්ඩාරනායකගෙන් පසු අගවිනිසුරු ධූරයට පත් දෙවැනි කාන්තාව වන විනිසුරු මුර්දු ප්‍රනාන්දු ප්‍රකාශ කළේ, නීතියේ ආධිපත්‍යය ශක්තිමත් කිරීමට සහ සාධාරණ පමණක් නොව විනිවිද පෙනෙන, ජනතාවට ප්‍රවේශ විය හැකි සහ වගකීම්සහගත අධිකරණයක් ගොඩනැගීමට තමන් අපේක්ෂා කරන බවයි.
“අධිකරණය, මට ප්‍රජාතන්ත්‍රවාදයේ බලකොටුව අයුක්තියේ ප්‍රහාරයෙන් ආරක්ෂා කරන සොල්දාදුවන්ගේ හමුදාවකට සමානයි. නීතිය ක්‍රියාකරන්නේ ව්‍යවස්ථාදායකය විසින් අපට ලබා දී ඇති සන්නාහය සහ පලිහ ලෙස වන අතර, එමඟින් අපේ රටේ පුරවැසියන් ආරක්ෂා කිරීම අපට පැවරී ඇත,” අගවිනිසුරුවරිය වැඩිදුරටත් පැවැසීය.
අභියාචනාධිකරණය, මහාධිකරණ, දිසා අධිකරණ සහ මහේස්ත්‍රාත් අධිකරණ යන ආයතනවල විනිසුරුවරුන් පිරිසක් විසින් අභිනවයෙන් තේරී පත් වූ අගවිනිසුරුවරිය උත්සව සභාවේදී උණුසුම් ලෙස පිළිගනු ලැබීය.
“අපි අනාගතය දෙස බලන විට, සෑම පුරවැසියෙකුගේම ජීවිත තුළ යුක්තියේ වැදගත්කම මට සිහිපත් වේ. යුක්තිය යනු හුදු පරමාදර්ශයක් නොවේ; එය පවුල්, ප්‍රජාවන් සහ ජාතීන්ට බලපාන ජීවමාන, හුස්ම ගැනීමේ බලයකි. නීතියේ ආධිපත්‍යය බියෙන් හෝ අනුග්‍රහයෙන් තොරව සාධාරණව හා අපක්ෂපාතීව ක්‍රියාත්මක වන බවට සහතික වීම සහ මෙම ශුද්ධ වූ ආයතනයට ඇතුළු වන සෑම පුද්ගලයෙකුම, ඔවුන්ගේ පසුබිම කුමක් වුවත්, ඔවුන්ට සවන් දෙන, තේරුම් ගන්නා සහ ආරක්ෂා කිරීමට උත්සාහ කරන ක්‍රමයක් සොයා ගැනීම අපගේ යුතුකමයි” යනුවෙන් අගවිනිසුරුවරිය වැඩිදුරටත් සඳහන් කළාය.
