බොරැල්ල, කනත්ත හන්දියේ සිදු වූ මාරක රිය අනතුර සම්බන්ධයෙන් අත්අඩංගුවට ගත් දොඹකර රියදුරු ගංජා පානය කර සිටි බවට වෛද්‍ය පරීක්ෂණවලින් තහවුරු වී තිබෙනවා.
අද (ජූලි 28) උදෑසන රාජගිරිය දෙස සිට බෞද්ධාලෝක මාවත දෙසට ධාවනය වෙමින් තිබූ දොඹකරයක් කනත්ත වටරවුමේ මාර්ග සංඥා අසල නවතා තිබූ යතුරුපැදි 6ක සහ මෝටර් රථ 3ක ගැටීමෙන් මෙම අනතුර සිදුවුණා.
අනතුරින් අවුරුදු 62ක් වූ අතුරුගිරිය ප්‍රදේශයේ පුද්ගලයෙක් ජීවිතක්ෂයට පත්වුණා. කොළඹ ජාතික රෝහලේ නියෝජ්‍ය අධ්‍යක්ෂ වෛද්‍ය රුක්ෂාන් බෙල්ලන මහතා පැවසුවේ, තුවාල ලැබූ එක් අයෙක් රෝහල් ගත කරන විටත් මියගොස් සිටි බවයි.
තුවාල ලැබූ තවත් පුද්ගලයන් 7 දෙනෙකු මේ වනවිට කොළඹ ජාතික රෝහලේ ප්‍රතිකාර ලබමින් සිටිනවා. ඔවුන් අතර කාන්තාවන් දෙදෙනෙකු සහ පිරිමි පුද්ගලයන් පස්දෙනෙකු වන බව වෛද්‍යවරයා සඳහන් කළා.
අනතුර සිදුකළ දොඹකරයේ රියදුරු අත්අඩංගුවට ගෙන ඇති අතර, දොඹකරයේ තිරිංග අක්‍රිය වීම හේතුවෙන් මෙම අනතුර සිදුව ඇති බවට පොලීසිය සැක පළ කරනවා. බොරැල්ල පොලීසිය සිද්ධිය සම්බන්ධයෙන් වැඩිදුර විමර්ශන සිදුකරමින් සිටිනවා.
