2015 ජනාධිපතිවරණ සමයේ රජයට රුපියල් මිලියන 53කට අධික පාඩුවක් සිදු කළ බවට චෝදනා එල්ල වූ, ආන්දෝලනාත්මක කැරම්බෝඩ් 14,000ක් සහ දාම් ලෑලි 11,000ක් නීතිවිරෝධී ලෙස මිලදී ගැනීමේ සිද්ධියට අදාළව, වසර 25ක සිර දඬුවම් නියම වී සිටින හිටපු අමාත්‍ය නලින් ප්‍රනාන්දු මහතා, එම දඬුවමට එරෙහිව ශ්‍රේෂ්ඨාධිකරණයට අභියාචනයක් ඉදිරිපත් කර තිබේ.
මෙම අභියාචනය, ශ්‍රේෂ්ඨාධිකරණයට ඉදිරිපත් කිරීම සඳහා කොළඹ මහාධිකරණය වෙත භාර දී ඇති බවයි වාර්තා වේ.
පෙත්සම්කරු වන නලින් ප්‍රනාන්දු මහතා සිය අභියාචනයෙන් කියා සිටින්නේ, අල්ලස් කොමිසම විසින් ගොනුකළ චෝදනාවලට තමන්ව වරදකරු කරමින් කොළඹ ත්‍රිපුද්ගල මහාධිකරණ විනිසුරු මඩුල්ලක් විසින් නියම කළ බරපතළ වැඩ සහිත වසර 25ක සිර දඬුවම් සහ දඩ මුදල් නීතියට පටහැනි බවයි.
අදාළ තීන්දුව බලරහිත කර, තමන්ව සියලු චෝදනාවලින් නිදොස් කොට නිදහස් කරන ලෙසට ඔහු ශ්‍රේෂ්ඨාධිකරණයෙන් ඉල්ලා සිටියේය.
