ගල්ඔය ප්‍රදේශයේදී වන අලි රංචුවකට හැප්පුනු මීනගයා අධිවේගී දුම්රිය රියදුරු පළපුරුදු රියදුරෙකු බව වනජීවී සංරක්ෂණ සංගමය හෙළි කරයි.
එහි ලේකම් නයනක රන්වැල්ල මහතා තවදුරටත් හෙළි කරන්නේ දුම්රිය ධාවනය කිරීම සඳහා රියදුරුට රාජ්‍ය සේවා කොමිසමේ නිර්දේශයක්වත් නොතිබූ බවයි.
“මේ දුම්රිය පදවාගෙන ගිහින් තියෙන්නේ වයස අවුරුදු 67ක් වෙච්ච අඩුගානේ රාජ්‍ය සේවා කොමිසමේ නිර්දේශයවත් නැති දුම්රිය රියදුරෙක්. ඔහුගේ අදාළ නිර්දේශ කාලපරිච්ඡේදය පසුගිය ජනවාරි 15 වනදායින් අවසන් වෙලා තියෙනවා. දුම්රිය දෙපාර්තමේන්තුවේ එවැනි දුම්රිය රියදුරන් 19 දෙනෙක් සිටින බවයි අපිට පෙනෙන්නට තියෙන්නේ. තමන්ගේ ඉහළ නිලධාරියාගේ කට වචනයට තමයි වයෝවෘධ රියදුරා මේ දුම්රිය අරන් ගිහින් තියෙන්නේ. බිමල් රත්නායක මහතා මේ ගැන දන්නේ නෑ. එතුමාට මේක දන්නේ නැතිනම් වහාම සොයා බලන්න කියලා කියනවා.”
20 වන දින රාත්‍රියේ මීනගයා අධිවේගී දුම්රියක ගැටීමෙන් වන අලි හත් දෙනෙකු මිය යාමෙන් පසු මෙම ගැටළුව නැවත වරක් කැළඹීමක් ඇති කර තිබේ.
වන අලින් දුම්රියේ ගැටීම වැළැක්වීම සඳහා සාර්ථක විසඳුමක් සොයා ගැනීමට බලධාරීන් මෙතෙක් සමත් වී නොමැත.
දුම්රිය සංවර්ධනය සඳහා වූ වෘත්තීය සමිති සන්ධානයේ කැඳවුම්කරු ඉන්දික දොඩන්ගොඩ සාක්ෂි දෙමින්, වල් අලින් දුම්රියේ ගැටීම වැළැක්වීම සඳහා සන්නිවේදන පද්ධතියක් රටට දැඩි ලෙස අවශ්‍ය වූ බව පැවසීය.
“මේ වෙනකොටත් දුම්රිය එන්ජින් වල එම උපකරණ සවි කරලා තියෙන්නේ ඒවා ක්‍රියාත්මක තත්ත්වයේ නෑ. ක්‍රියාත්ම වෙනවා කියලා ඒ අදාළ සමාගම් වලට සම්පූර්ණ ගෙවීම් කරලා තියෙනවා. අනිත් එක දුම්රියවලට සවිකරන්න තරම් ප්‍රමාණවත් උපකරණ මිලදී ගෙන නෑ. නමුත් ව්‍යාපෘතිය ඩොලර් මිලියන 17ක් වැයකරලා තියෙනවා. විශේෂයෙන්ම අලි ගැටීම් සම්බන්ධයෙන් කතා කරොත් එකට පණිවිඩ දෙන්න. උපක්‍රමයක් ඒ තුල හදන්න තිබුණනේ. වනඅලි දුම්රියේ ගැටීම සම්බන්ධයෙන් සංනිවේදන උපකරණ වල දැඩි අවශ්‍යතාවයක් තියෙනවා.”
