යාල ජාතික වනෝද්‍යානයට අයත් කලාප අංක 05 ප්‍රදේශයේ, ඊයේ (ජූනි 12) සිදුකළ විශේෂ මෙහෙයුමකදී, සරුවට වගාකර තිබූ ගංජා හේන් 03ක් වටලා, ගංජා පැල 144,900ක් ගිනි තබා විනාශ කිරීමට ගෝනගංආර පොලිසිය සමත් වී තිබේ. මෙම දැවැන්ත වැටලීම තුළින් රුපියල් ලක්ෂ 150කට අධික වටිනාකමකින් යුත් මත්ද්‍රව්‍ය තොගයක් විනාශ වී ඇත.
අත්අඩංගුවට පත් ගංජා හේන් අතර, අක්කර එකහමාරක් පුරා පැතිරුණු විශාල ගංජා හේනක් මෙන්ම අක්කර භාගය බැගින් වූ තවත් ගංජා හේන් 02ක් ද තිබූ බව මෙම වැටලීම සඳහා එක් වූ පොලිස් නිලධාරියෙක් සඳහන් කළේය.
මෙම වැටලීම සිදු කරන අවස්ථාවේදී, ගංජා හේන්වල සිටි සැකකරුවන් පොලිස් අත්අඩංගුවට පත් නොවී පලා යාමට සමත් වී තිබේ. කෙසේ වෙතත්, බුත්තල පොලිස් විශේෂ කාර්ය බලකායේ නිලධාරීන් සහ ගෝනගංආර පොලිසිය එක්ව සිදුකළ මෙම සාර්ථක මෙහෙයුම මගින් රටේ මත්ද්‍රව්‍ය ජාවාරමට එරෙහිව දැවැන්ත පියවරක් තබා ඇත.
අත්අඩංගුවට පත් ගංජා පැලවලින් කොටසක් ඉදිරි අධිකරණ කටයුතු සඳහා සාක්ෂි ලෙස ඉදිරිපත් කිරීමට ගෝනගංආර පොලිසිය කටයුතු කර ඇත.
