අද (ජූනි 14) උදෑසන මීගමුව, කොච්චිකඩේ කම්මල් තොටුපොළ මුහුදු තීරයේ නවතා තිබූ ත්‍රිරෝද රථයක් තුළින් පොලිස් නිලධාරියෙකුගේ පිළිස්සුණු මළ සිරුරක් සොයා ගැනීමත් සමඟ ප්‍රදේශයේ දැඩි ආන්දෝලනයක් හටගෙන තිබේ.
මෙලෙස අභිරහස් ලෙස මියගොස් ඇත්තේ මීගමුව කොට්ඨාස අපරාධ විමර්ශන ඒකකයේ සේවය කළ, 56 හැවිරිදි පොලිස් සැරයන් රියදුරෙකු වන ජයන්ත පුෂ්පකුමාර මහතා බව පොලීසිය පවසයි. ඒ මහතා මීගමුව දළුපත ප්‍රදේශයේ පදිංචිකරුවෙකි.
අද උදෑසන මෙම සිද්ධිය දැක ඇත්තේ ප්‍රදේශවාසීන් විසින් වන අතර, ඔවුන් වහාම කොච්චිකඩේ පොලීසිය දැනුවත් කර තිබේ. ඒ අනුව, කොච්චිකඩේ පොලීසිය හා මීගමුව ජ්‍යෙෂ්ඨ පොලිස් අධිකාරී කාර්යාලය එක්ව මේ වනවිට විමර්ශන ආරම්භ කර ඇත.
කෙසේ වෙතත්, මෙම සිද්ධිය සම්බන්ධයෙන් මෙතෙක් කිසිදු තොරතුරක් අනාවරණය වී නොමැති අතර, මළ සිරුර මහේස්ත්‍රාත් පරීක්ෂණයෙන් අනතුරුව පශ්චාත් මරණ පරීක්ෂණය සඳහා මීගමුව මහ රෝහල වෙත රැගෙන යාමට නියමිතයි.
