එළැඹෙන පාර්ලිමේන්තු මහ මැතිවරණය සඳහා ජාතික නිදහස් පෙරමුණ තරඟ නොකරන බව එම පක්ෂයේ නායක හිටපු පාර්ලිමේන්තු මන්ත්‍රී විමල් වීරවංශ පවසයි.
අද (ඔක්. 10) නිවේදනයක් නිකුත් කරමින් ඔහු මේ පිළිබඳව සඳහන් කළේ ය.
එම නිවේදනයේ සඳහන් කර ඇත්තේ, රටේ ජනතාව නිදහස් සහ සාමකාමී මැතිවරණයක් මගින් ජනාධිපතිවරයා තෝරාපත් කර ගෙන ඇති බව ත් කෙසේ නමුත් ශ්‍රී ලංකාවට හතුරු විදේශීය බලවේගවල අපේක්ෂාව වූයේ එවැනි තත්ත්වයක් නොවන අතර ජනාධිපතිවරණයට පෙර යම් රටවල් විසින් සංචාරකයින් ලෙස ශ්‍රී ලංකාවට පැමිණෙන තම රටවැසියන්ට නිකුත් කළ අනතුරු ඇඟවීම්වලින් එය පැහැදිලි වන බව ත් ය.
එම නිවේදනයේ තවදුරට ත් සඳහන් කර ඇත්තේ, අනුර දිසානායක ජනාධිපතිවරයා ‘දෙවන ගෝඨාභය’ බවට පත්කිරීම සඳහා රටට හතුරු අධිරාජ්‍යවාදී න්‍යාය පත්‍රයට සේවය කරන යම් විපක්ෂ බලවේගවලට උවමනාවක් තිබෙන බවට සැකයක් නොමැති බව ය.
එහෙත් තම පක්ෂය එම උවමනාව නියෝජනය කරමින් රට තවදුරට ත් අර්බුදයට ගොදුරු කිරීමට දායක නොවන බව ද ඉතා වගකීමෙන් යුතුව ප්‍රකාශ කරන බව හිටපු පාර්ලිමේන්තු මන්ත්‍රීවරයා නිවේදනය මගින් සඳහන් කර තිබේ.
