පොංගල් සමරන්න රතු හාල් හරහට හිටීද ?

තෛපොංගල් සැමරුම් සඳහා අවශ්‍ය අමුද්‍රව්‍යයක් වන රතු සහල් මේ දිනවල හිඟවීම හින්දු ප්‍රජාවට බලපා ඇති බව වාර්තා වේ

බොහෝ හින්දු භක්තිකයන්ට ඔවුන්ගේ සාම්ප්‍රදායික චාරිත්‍ර වාරිත්‍ර සහ පූජා සඳහා අවශ්‍ය රතු සහල් ලබා ගැනීම දුෂ්කර වී ඇතැයි වාර්තා වේ.

ආහාර සුරක්ෂිතතා නියෝජ්‍ය ඇමැති ආර්.එම්. ජයවර්ධන පවසන්නේ මෙම හිඟයට හේතුව සහල් බෙදා හැරීමේ පෙර ප්‍රතිපත්ති බවයි.

දැනටමත් ප්‍රමාණවත් සහල් තොග ඇති පුද්ගලයන් ද රතු සහල් ලබා ගැනීමට යෑම පැවති තත්ත්වය තවත් නරක අතට හැරවූ බව ඔහු අවධාරණය කරයි.

අනාගතයේදී එවැනි හිඟයන් වළක්වා ගැනීමේ අරමුණින්, දේශීය ගොවීන්ට සහාය වීම සහ වෙළඳපොළ පැවැත්ම ස්ථාවර කිරීම සඳහා වඩා හොඳ සැලසුම් සකස් කිරීමේ සහ තිරසාර ප්‍රතිපත්ති ක්‍රියාත්මක කිරීමේ වැදගත්කම ජයවර්ධන නියෝජ්‍ය ඇමැතිවරයා අවධාරණය කරයි.

ලුණුගම්වෙහෙර, පන්නෙගමුව පිහිටි ගබඩා සංකීර්ණයකට ගිය අවස්ථාවේදී අදහස් දක්වමින් නියෝජ්‍ය ඇමැතිවරයා සහතික වූයේ මෙම වසරේ සිට රතු සහල් හිඟය විසඳීමට රජය කැපවී සිටින බවයි.

“ඉතිහාසයේ ශ්‍රී ලංකාව රතු සහල් හිඟයකට මුහුණ දී නැහැ. කෙසේවෙතත්, මෑත වසරවලදී, අඩු මිල ගණන් සහ වෙළෙඳ පොළ අඩුවීම හේතුවෙන් ගොවීන් රතු සහල් වගාවෙන් ඉවත් වී සුදු සහල් සහ කීරි සම්බා වැනි ඉහළ ඉල්ලුමක් ඇති ප්‍රභේද තෝරාගෙන තිබෙනවා” යනුවෙන් ඔහු පැහැදිලි කරයි.

ගැටලුව හඳුනාගත් පසු රජය පෞද්ගලික අංශය සමඟ රතු සහල් මිලදී ගැනීමට උත්සාහ කළ ද ඉන්දියාවෙන් මිලදී ගැනීම සඳහා රතු සහල් සොයා ගැනීමට නොහැකි වූ බව ඔහු තවදුරටත් සඳහන් කරයි.

කෙසේවෙතත්, ගැටලුවට විසඳුමක් සම්බන්ධයෙන් ඔහු ශුභවාදී අදහස් පළ කරමින් සඳහන් කළේ ජනවාරි අවසානය වන විට අම්පාරේ වී කැපීම ඇරඹෙන බැවින් රතු කැකුළු හිඟය විසඳෙනු ඇති බවයි.

මේ අතර සමස්ත ලංකා කුඩා හා මධ්‍ය පරිමාණ සහල් මෝල් හිමියන්ගේ සංගමයේ සභාපති බී.කේ. රංජිත් අවධාරණය කරන්නේ ගබඩා පහසුකම්වල අඩුව සහ දුර්වල බෙදාහැරීමේ සැලසුම් මෙම හිඟය පිටුපස ඇති ප්‍රධාන සාධක බවයි.

“බොහෝ ගබඩා පහසුකම් දිගු කාලීන බෙදාහැරීම සඳහා තොග පවත්වාගෙන යන මහා පරිමාණ මෝල් හිමියන් විසින් පාලනය කරන නිසා කුඩා පරිමාණ වෙළඳුන් ගැටලුවලට මුහුණ දෙනවා. ඒ නිසා සංචිත තියෙන්නේ මහා පරිමාණ වෙළඳුන් ළඟ ,” යනුවෙන් ඔහු සඳහන් කළේය.

“මහා පරිමාණ සහල් ව්‍යවසායකයන් සාමාන්‍යයෙන් මාස 6-10ක් ඉදිරියට බෙදා හැරීම සඳහා සහල් තොග තියාගන්නවා. නමුත් කුඩා පරිමාණ ව්‍යවසායකයන්ට එවැනි ගබඩා ධාරිතාවක් නැහැ ,” යැයි ඔහු පැහැදිලි කරයි.

තොග ගබඩා කිරීම පිළිබඳ චෝදනා ද ප්‍රතික්ෂේප කරමින් ඔහු සඳහන් කළේ දැනට ඇති තොග සැඟවූතොග නොව අනාගත බෙදා හැරීම සඳහා ගබඩා කර ඇති සංචිත බවයි.

සෑම වසරකම සහල් හිඟයට කෙටි කාලීන විසඳුම් වෙත යොමු වීමට වඩා ක්‍රියාශීලී ප්‍රවේශයක් අනුගමනය කිරීමට කාලය බව ද ඔහු සඳහන් කරයි.
(The Sunday Morning)