බැංකු ණය ලබාගෙන ඇප ලෙස තබා ඇති දේපල රාජසන්තක කිරීමට බැංකුවලට බලය ලබා දෙන පරාටේ නීතිය ඊයේ (ජුනි 30) මධ්‍යම රාත්‍රියේ සිට නැවතත් බලාත්මක වී තිබේ .
පසුගිය කාලය පුරාවට මෙම නීතිය අත්හිටුවා තිබූ අතර, මුලින්ම හිටපු ජනාධිපති රනිල් වික්‍රමසිංහ මහතා විසින් මාස 06කටත්, ඉන් අනතුරුව වත්මන් රජය විසින් මාස 03කටත් එය අත්හිටුවා තිබුණි. එම කාලසීමාවන් අවසන් වීමත් සමඟ අද සිට නීතිය යළි ක්‍රියාත්මකයි.
කෙසේ වෙතත්, පරාටේ නීතිය නැවත ක්‍රියාත්මක වීමත් සමඟ මතුවිය හැකි ගැටළු පිළිබඳව රජයේ අවධානය යොමුවී ඇති බව පෙනේ. කම්කරු අමාත්‍ය සහ ආර්ථික සංවර්ධන නියෝජ්‍ය අමාත්‍ය ආචාර්ය අනිල් ජයන්ත මහතා ප්‍රකාශ කර ඇත්තේ, මෙම ගැටළු සම්බන්ධයෙන් අදාළ පාර්ශව සමඟ සාකච්ඡා කර විසඳුම් ලබා දීමට බලාපොරොත්තු වන බවයි. ඒ සඳහා ඉදිරි දින කිහිපය තුළ සාකච්ඡා පැවැත්වීමට සැලසුම් කර ඇති බවද අමාත්‍යවරයා වැඩිදුරටත් සඳහන් කළා.
මෙම තත්ත්වය තුළ බැංකු ණය ලබාගෙන ඇති පුද්ගලයන්ට සහ ව්‍යාපාරවලට දැඩි අවධානයෙන් කටයුතු කිරීමට සිදුවනු ඇත. ණය ගෙවීම් සම්බන්ධයෙන් පැහැර හැරීම් තිබේ නම්, වහාම බැංකු සමඟ සාකච්ඡා කර සුදුසු විසඳුමකට එළඹීම වැදගත් වනු ඇත.
