සමගි ජන බලවේගයේ හිටපු පාර්ලිමේන්තු මන්ත්‍රිනි තලතා අතුකෝරළ මහත්මිය ජනාධිපති රනිල් වික්‍රමසිංහ මහතාට සහාය පළ කිරීමට වැලිමඩ ජනපතිවරණ ප්‍රචාරක රැළියට ඊයේ (08) සහභාගී වූවා ය.
විශේෂ ප්‍රකාශයක් කරමින් ඉකුත් දා පාර්ලිමේන්තු මන්ත්‍රී ධූරයෙන් ඉල්ලා අස්වූ තලතා අතුකෝරළ මහත්මිය ජනාධිපතිවරයාගේ මැතිවරණ ව්‍යාපාරයට සහාය පළ කරමින් වේදිකාවකට ගොඩ වූ පළමු අවස්ථාව මෙය විය.
ජනාධිපති රනිල් වික්‍රමසිංහ මහතාගේ ප්‍රධානත්වයෙන් වැලිමඩ ජනරැළිය පැවති අතර වේදිකාවට සහභාගී වූ හිටපු මන්ත්‍රීවරිය පාක්ෂිකයන්ගෙන් ඉහළ ප්‍රතිචාරයක් ලැබිණි.
රාජ්‍ය අමාත්‍ය චාමර සම්පත් දසනායක සහ හිටපු අමාත්‍ය හරීන් ප්‍රනාන්දු යන මහත්වරුන් විසින් තලතා අතුකෝරළ මහත්මිය උණුසුම්ව පිළිගනු ලැබීය.
එක්සත් ජාතික පක්ෂයෙන් කැඩී සමගි ජන බලවේගය ගොඩනැඟීම පිළිබඳව ඉතා කණගාටුවෙන් අදහස් පළ කළ ඇය, ඉකුත් දා පාර්ලිමේන්තු මන්ත්‍රී ධූරයෙන් ඉල්ලා අස්වූවා ය.
