ගිනියාවේ දෙවැනි විශාලතම නගරය වන N’zérékoré හි පැවැති පාපන්දු තරඟයක් අතරතුර හටගත් ගැටුමකින් පුද්ගලයන් රැසක් මියගොස් ඇති බව විදේශීය ජනමාධ්‍ය වාර්තා කරයි.
අග්‍රාමාත්‍ය Mamadou Oury Bah පවසා ඇත්තේ, තෙරපීම පුද්ගලයන් ගණනාවකගේ අවාසනාවන්ත ඉරණමට හේතු වූ බවයි.
මේ මොහොතේ සන්සුන්ව කටයුතු කරන ලෙස ද ඔහු ජනතාවගෙන් ඉල්ලා තිබේ.
අනන්‍යතාව හෙළි නොකළ වෛද්‍යවරයෙක් උපුටා දක්වමින් AFP ප්‍රවෘත්ති ඒජන්සිය වාර්තා කළේ, ප්‍රාදේශීය රෝහලක මළසිරුරු රැසක් පෙළට තබා ඇති බවයි.
එවැනි මළසිරුරුවලින් රෝහලේ මෘත ශරීරාගාරය පිරී ඇති බව ද එම වෛද්‍යවරයා අනාවරණ කර තිබේ.
එරට ප්‍රාදේශීය ජනමාධ්‍ය පැවසුවේ තරගය සඳහා සහභාගී වී සිටි එක් කණ්ඩායමක ආධාරකරුවන් විනිසුරුවරයා කෙරෙහි කෝපයෙන් පිටිය දෙසට ගල් ගැසීමෙන් පසුව පොලිසිය කඳුළු ගෑස් ප්‍රහාර එල්ල කළ බවයි.
ගිනියාව මෙතෙක් නිල වශයෙන් මියගිය පිරිසගේ සංඛ්‍යා ලේඛන නිකුත් කර නොමැත.
“ඒ සියල්ල ආරම්භ වූයේ විනිසුරුගේ විවාදාත්මක තීරණයකින්. ඊට පස්සේ ක්‍රීඩා ලෝලීන් ක්‍රීඩාපිටිය ආක්‍රමණය කළා,” සිද්ධිය ඇසින් දුටු පුද්ගලයෙකු AFP වෙත පවසා ඇත.
සමාජ මාධ්‍යවල හුවමාරු වන වීඩියෝ සහ ඡායාරූප ක්‍රීඩාංගණයෙන් පිටත අවුල් සහගත දර්ශන පෙන්වන අතර, විශාල ජනකායක් ක්‍රීඩාංගනයේ තාප්පය මතින් නැගීමට උත්සාහ කරන අයුරු සහ මළ සිරුරු රාශියක් ඒ ආසන්නයේ ඇති අයුරු ඒවායේ දැක්වේ.
මෙම වීඩියෝ ස්වාධීනව සත්‍යාපනය කිරීමට නොහැකි බව බීබීසී පුවත් සේවය වාර්තා කර ඇත.
