යෝජිත ද්විපාර්ශ්වික ආර්ථික සහ තාක්ෂණ සහයෝගිතා ගිවිසුම (ETCA) පිළිබඳව ජනාධිපතිවරයාගේ ඉන්දීය සංචාරයේදී සාකච්ඡා කළ බව ශ්‍රී ලංකාවේ ඉන්දීය මහ කොමසාරිස් සන්තෝෂ් ජා පවසයි.
ජනමාධ්‍යවේදීන් අමතමින් මහකොමසාරිස්වරයා කියාසිටියේ සාකච්ඡා සිදුකළ ද ගිවිසුම සම්බන්ධයෙන් අවසන් තීරණයකට එළඹී නොමැති බවයි.
“ඒකාබද්ධ ප්‍රකාශයෙන් ඔබ්බට කිසිවක් නැහැ, අඛණ්ඩ සාකච්ඡා පිළිබඳව ඉතා පැහැදිලියි” ඔහු පැවසීය.
“එය නිශ්චිත කාල රාමුවක් තුළ අවසන් වේද නැතහොත් ඊට වැඩි කාලයක් ගතවේද යන්න තීරණය වන්නේ එය කිරීමට දෙපාර්ශවයේම පවතින උනන්දුව මතයි. එය තවමත් විසඳිය යුතු ප්‍රශ්න මතද රඳාපවතිනවා” මහකොමසාරිස්වරයා පැවසීය.
මෙම කාරණය සම්බන්ධයෙන් කාලසීමාවක් පැනවීම යථාර්ථවාදී නොවන බව ද ඉන්දීය මහ කොමසාරිස් සන්තෝෂ් ජා පෙන්වාදුන්නේය.
දෙසැම්බර් මාසයේදී සිදුකෙරුණු ජනාධිපති අනුර කුමාර දිසානායකගේ ඉන්දීය සංචාරයේදී සාකච්ඡාවට ලක් වූ මාතෘකා අතර පැවැති යෝජිත ETCA ගිවිසුම සම්බන්ධයෙන් ජනමාධ්‍යවේදීන් නැගූ ප්‍රශ්නවලට පිළිතුරු දෙමින් මහකොමසාරිස්වරයා මෙම අදහස් පළකළේය.
