මහනුවර ඓතිහාසික ඇහැලේපොළ වලව්වේ ඉදිකළ ඉටි රූප කෞතුකාගාරය අද (ජූලි 17) පෙරවරුවේ ජනාධිපති අනුර කුමාර දිසානායක මහතා අතින් විවෘත කෙරිණි.
නාගරික සංවර්ධන අධිකාරිය විසින් ප්‍රතිසංස්කරණය කරන ලද ඇහැලේපොළ වලව්ව ශ්‍රී දළදා මාළිගාවට පවරා දීමෙන් අනතුරුව, එහි පුරාවිද්‍යාත්මක හා සංස්කෘතික වටිනාකම් සුරක්ෂිත කරගනිමින් මෙම කෞතුකාගාරය නිර්මාණය කර තිබේ.
මෙම කෞතුකාගාරය මඟින් කන්ද උඩරට රාජධානියේ ගෘහ නිර්මාණ ශිල්පය, චාරිත්‍ර වාරිත්‍ර සහ කලා ශිල්ප ඉටි ආශ්‍රයෙන් ප්‍රතිනිර්මාණය කර ඇත. එපමණක් නොව, පාරම්පරික කර්මාන්ත පිළිබඳ ප්‍රදර්ශන කුටි මෙන්ම ඉපැරණි භෝජනාගාරයක්ද මෙහි ස්ථාපිත කර තිබේ.
ඉතිහාසයේ සුවිශේෂී චරිත 35කට අදාළ ජීවමාන ඉටි රූප මෙහිදී දැකගත හැකිය. ඒ අතර වැලිවිට ශ්‍රී සරණංකර සංඝරාජ හිමි, වාරියපොල ශ්‍රී සුමංගල හිමි, පළමු වන විමලධර්මසූරිය රජු, කුසුමාසන දේවිය, මොණරවිල කැප්පෙටිපොළ දිසාව, දේවේන්ද්‍ර මුලාචාරිතුමා, රොබට් බ්‍රවුන්රිග් ආණ්ඩුකාරවරයා, ඇහැලේපොළ මහාධිකාරම්, කුමාරිහාමි සහ ඔවුන්ගේ දරුවන් දෙදෙනාද වෙති.
ශ්‍රී ලංකාවේ ප්‍රෞඪත්වය සහ අභිමානය විදහා දැක්වෙන අයුරින් නිම කර ඇති මෙම කෞතුකාගාරය මහනුවරට පැමිණෙන දෙස් විදෙස් සංචාරකයන්ගේ මහත් ආකර්ෂණයට ලක්වනු ඇතැයි අපේක්ෂා කෙරේ. වත්මන් පරපුරට උඩරට රාජධානිය සහ ඒ සමඟ බැඳුණු ඉතිහාසය නිවැරදිව අධ්‍යයනය කළ හැකි මධ්‍යස්ථානයක් බවටද මෙය පත්වනු ඇත.
ගම්පොළ ප්‍රදේශයේ පදිංචි අතුල හේරත් මහතා මෙහි නිර්මාණ ශිල්පියා වන අතර, ශ්‍රී දළදා මාළිගාවේ ඇහැලේපොළ වලව්ව කෞතුකාගාර විශේෂ ව්‍යාපෘතිය යටතේ ක්‍රියාත්මක වූ මෙම කටයුත්ත සඳහා රුපියල් මිලියන 300ක මුදලක් වැය කර ඇත.
මෙම අවස්ථාවට සියම් මහා නිකායේ මල්වතු සහ අස්ගිරි පාර්ශ්වයන්හි අනුනායක හිමිවරුන් ඇතුළු මහා සංඝරත්නය, කෘෂිකර්ම, පශු සම්පත්, ඉඩම් සහ වාරිමාර්ග අමාත්‍ය කේ.ඩී. ලාල්කාන්ත මහතා, ශ්‍රී දළදා මාළිගාවේ දියවඩන නිලමේ ප්‍රදීප් නිලංග දෑල මහතා සහ විවිධ ක්ෂේත්‍රයන්හි විද්වතුන් ඇතුළු ආරාධිතයන් පිරිසක් සහභාගී වූහ.
