ජාතික අධ්‍යාපන විද්‍යාපීඨ, ගුරු විද්‍යාල සහ ගුරු සංවර්ධන මධ්‍යස්ථානවල කථිකාචාර්යවරු අද (ජුනි 26) සහ හෙට (ජුනි 27) දිනවලදී අසනීප නිවාඩු වාර්තා කරමින් වෘත්තීය ක්‍රියාමාර්ගයක නිරත වෙති. ඔවුන්ගේ ඉල්ලීම් කිහිපයක් මුල් කර ගනිමින් මෙම ක්‍රියාමාර්ගය ගෙන ඇත.
ශ්‍රී ලංකා අධ්‍යාපනඥ සේවා කථිකාචාර්ය වෘත්තීය සංගමයේ ලේකම් එස්.එම්.පී. බණ්ඩාර මහතා පැවසුවේ, අධ්‍යාපන විද්‍යාපීඨ 19 ක, ගුරු විද්‍යාල 8 ක සහ ගුරු සංවර්ධන මධ්‍යස්ථාන 112 ක කථිකාචාර්යවරු මෙම වෘත්තීය ක්‍රියාමාර්ගයට එක්වන බවයි.
ඔවුන්ගේ ඉල්ලීම් සම්බන්ධයෙන් අධ්‍යාපන හා උසස් අධ්‍යාපන අමාත්‍යාංශ ලේකම් නාලක කලුවැව මහතා සමඟ සාකච්ඡා කළ නමුත්, පිළිගත හැකි විසඳුමක් නොලැබුණු බව ලේකම්වරයා සඳහන් කළේය. මේ හේතුවෙන්, කලින් තීරණය කර තිබූ පරිදි වෘත්තීය ක්‍රියාමාර්ගය ආරම්භ කරන බවත්, සිය ඉල්ලීම් දිනා ගැනීම සඳහා ඉදිරියේදී අඛණ්ඩ වර්ජනයකට යාමට සංගමය තීරණය කර ඇති බවත් බණ්ඩාර මහතා වැඩිදුරටත් පැවසීය.
