පාස්කු ඉරිදා ප්‍රහාරය සම්බන්ධයෙන් සහ මහබැංකු බැඳුම්කර වංචාව සම්බන්ධයෙන් විමර්ශන කටයුතු මේ වනවිට ආරම්භ කර ඇතැයි කැබිනට් මාධ්‍ය ප්‍රකාශක අමාත්‍ය විජිත හේරත් පවසයි.
ඔහු මේ බව සඳහන් කළේ, අද (ඔක්. 1) කැබිනට් මාධ්‍ය හමුවේදී ය.
මහජන ආරක්ෂක අමාත්‍යාංශය මගින් ඒ පිළිබඳ අදාළ නිත්‍යානුකුලව කළ යුතු පරීක්ෂණ ආරම්භ කර ඇති බව අමාත්‍යවරයා තවදුරට ත් සඳහන් කළේ ය.
ඔහු සඳහන් කළේ, ජනාධිපති විශේෂ කොමිසම් වාර්තාව, පාර්ලිමේන්තු විශේෂ තේරීම්කාරක සභා වාර්තාව සහ හිටපු ජනාධිපති මෛත්‍රීපාල සිරිසේන පත් කර විශේෂ ජනාධිපති කොමිසම් වාර්තාව සැලකිල්ලට ගනිමින් මෙම විමර්ශන කටයුතු සිදු කරන බව ය.
එමෙන් ම, මහ බැංකු බැඳුම්කර වංචාව සම්බන්ධයෙන් මාධ්‍ය ප්‍රකාශකවරයා මෙසේ සඳහන් කළේ ය.
“රනිල් වික්‍රමසිංහ මහත්තයත් දැන් ජනාධිපතිවරයා නෙමෙයි. ඒ නිසා ‘මුක්තිය’ නැහැ. ඒ නඩුව ඇත්තට ම ඉදිරියට ගියේ නැත්තේ ව්‍යවස්ථාවේ තියෙන මුක්තිය බලය පාවිච්චි වෙලා. දැන් අපිට එතුමාව අධිකරණය හමුවට කැඳවන්න බලය තියෙනවා.”
