ගොවි ජන සංවර්ධන දෙපාර්තමේන්තුවේ කොමසාරිස් ජනරාල් රෝහණ රාජපක්ෂ විසින් වගා නොකළ ඉඩම් හිමියන්ට වැදගත් දැනුම් දීමක් කර තිබේ. ඒ අනුව, සති දෙකක කාලයක් තුළ සිය වගා නොකළ ඉඩම්වල වගා කටයුතු සිදු නොකිරීමට හේතු පැහැදිලි කරන ලෙස ඔහු දැනුම් දී ඇත. මෙය රටේ ආහාර සුරක්ෂිතතාව තහවුරු කිරීමට ගත් තීරණාත්මක පියවරක් ලෙස සැලකේ.
මෙම දැනුම් දීම නිකුත් කර ඇත්තේ, දිවයින පුරා අක්කර එක් ලක්ෂ විසිදහසකට (120,000) අධික වගා බිම් ප්‍රමාණයක් කිසිදු වගාවක් නොමැතිව අත්හැර දමා ඇති බවට දෙපාර්තමේන්තුව විසින් හඳුනාගෙන ඇති පසුබිමකයි. මෙවැනි තත්ත්වයක් රටේ කෘෂිකාර්මික නිෂ්පාදනයට සහ ආහාර සුරක්ෂිතතාවයට සෘජුවම බලපාන බැවින්, මෙම අත්හැර දැමූ ඉඩම් නැවත වගා කටයුතු සඳහා යොදා ගැනීම රජයේ ප්‍රධාන අරමුණ වී තිබේ.
ගොවි ජන සංවර්ධන දෙපාර්තමේන්තුව පවසන්නේ, වගා නොකළ ඉඩම් හඳුනාගැනීම සඳහා විශේෂ වැඩසටහනක් ක්‍රියාත්මක කර ඇති බවයි. මෙම වැඩසටහන මගින් ඉඩම්වල උපයෝගිතාව උපරිමයෙන් ලබා ගැනීමත්, රටේ කෘෂිකාර්මික නිෂ්පාදනය ඉහළ නැංවීමත් අපේක්ෂා කෙරේ.
