ඩබ්ලිව්.එම්. මෙන්ඩිස් ඩිස්ටිලරීස් සමාගම විසින් රුපියල් බිලියන 3.5 ක අගය එකතු කළ බද්ද (වැට්) ගෙවීම පැහැරහැරීම සම්බන්ධයෙන් සිරදඬුවම් විඳිමින් සිටි එහි අධ්‍යක්ෂ අර්ජුන් ඇලෝෂියස් සහ තවත් දෙදෙනෙකු බන්ධනාගාරය තුළ ඔවුන්ගේ යහපත් හැසිරීම මත පදනම්ව මාස දෙකකට පෙර බන්ධනාගාරයෙන් නිදහස් කර ඇතැයි වාර්තා වේ.
බන්ධනාගාර මාධ්‍ය ප්‍රකාශක ගාමිණී දිසානායක පැවසුවේ, සෙනසුරාදා වැලිකඩ බන්ධනාගාරයෙන් ඔවුන් නිදහස් කළ බවයි.
පසුගිය වසරේ ඔක්තෝබර් මාසයේදී, රුපියල් බිලියන 3.5 ක වැට් බද්ද ගෙවීමට අපොහොසත්වීම සම්බන්ධයෙන් කොළඹ ප්‍රධාන මහේස්ත්‍රාත් අධිකරණය විසින් තිදෙනාට මාස හයක සිරදඬුවමක් නියම කරන ලදී.
සිරකරුවන්ට ඔවුන්ගේ හැසිරීම සහ බන්ධනාගාරය තුළ වැඩ වැඩසටහන් සඳහා ක්‍රියාකාරී සහභාගීත්වය මත පදනම්ව ලකුණු උපයා ගත හැකි බව මාධ්‍ය ප්‍රකාශකයා පැවසීය. මෙම කරුණු ඔවුන්ගේ දඬුවම තුනෙන් එකකින් අඩුකිරීමට දායක වේ.
එහි ප්‍රතිඵලයක් ලෙස, අර්ජුන් ඇලෝෂියස් සහ අනෙක් අය මාස දෙකකට පෙර නිදහස් කරන ලදී.
කෙසේවෙතත්, යහපත් හැසිරීම සහ බන්ධනාගාර වැඩ වැඩසටහන්වලට සහභාගී වීම තුළින් සිරකරුවන්ට ඔවුන්ගේ දඬුවම් අඩු කරගැනීමට ඉඩ සලසන 3/1 යහපත් හැසිරීම් රීතිය අදාළ වන්නේ ස්ථාවර සිරදඬුවම් නියමවූවන්ට පමණක් බවත්, ජීවිතාන්තය දක්වා සිරදඬුවම් නියමවූවන්ට නොවන බවත් ප්‍රකාශකයා පැහැදිලි කළේය.
