දින දෙකක් පුරා පැවති දැඩි ඡන්ද විමසීමකින් පසුව, ඇමරිකානු ජාතික රොබට් ප්‍රෙවොස්ට් කාදිනල්තුමා නව පාප් වහන්සේ ලෙස තේරී පත්වී තිබේ.
69 හැවිරිදි වියේ පසුවන උන්වහන්සේ, ඇමරිකා එක්සත් ජනපදයෙන් තේරී පත් වූ පළමු පාප්වරයා ලෙස ඉතිහාසයට එක්වෙයි. මෙම තේරී පත්වීමත් සමඟම, ලොව පුරා විසිරී සිටින බිලියන 1.4 කට අධික කතෝලික ජනතාවගේ නායකත්වය උන්වහන්සේට හිමිවනු ඇත.
මීට පෙර පාප් පදවිය හෙබවූ ශුද්ධෝත්තම ෆ්‍රැන්සිස් පාප් වහන්සේ අපවත් වීමෙන් අනතුරුව මෙම නව තේරී පත් වීම සිදු විය. 88 වන වියේ පසුවූ ෆ්‍රැන්සිස් පාප් වහන්සේ පසුගිය අප්‍රේල් මස 21 වන දින වතිකානයේ පිහිටි සිය නිවසේදී අභාවප්‍රාප්ත විය. එදිනට පෙර දිනයේදී එනම් අප්‍රේල් 20 වන දින වතිකානුවේ ශාන්ත පීතර බැසිලිකාවේ පැවති පාස්කු ඉරිදා දේව මෙහෙයට උන්වහන්සේ සහභාගී වී තිබුණි.
