ගම්පහ විද්‍යාලයකට දරුවකු ඇතුළත් කිරීමේදී දුෂණයක් සිදුකරන ලදැයි වසර 10 කට පසු වරද පිළිගත් එම විද්‍යාලයේ හිටපු විදුහල්පතිවරයකුට වසර 03 ක ලිහිල් සිර දඬුවමක් කොළඹ මහාධිකරණ විනිසුරු සුජීව නිශ්ශංක නියම කළේය.
අදාළ නඩුව මෙම මස 10 වැනිදා විභාගයට ගත් අවස්ථාවේදී විත්තිකරු අදාළ චෝදනාවන්ට වරද පිළිගත්තේය.
එම කරුණු සලකා බැලූ විනිසුරුවරයා විත්තිකරුට වසර 03 ක ලිහිල් සිර දඬුවමක් නියම කළේය.
එසේම එම සිරදඬුවමට අමතරව සැකකාර හිටපු විදුහල්පතිවරයාට රුපියල් ලක්ෂයක දඩයක් නියම කළ අතර විනිසුරුවරයා එය නොගෙවන්නේ නම් අමතර මාස 03 ක ලිහිල් සිරදඬුවමක් ද විත්තිකරුට නියම කළේය.
2015 වසරේදී පහ ශ්‍රේණිය සඳහා ගම්පහ ප්‍රාථමික විද්‍යාලයක දරුවකු ගම්පහ ප්‍රධාන විද්‍යාලයට ඇතුළත් කර ගැනී‌ම සඳහා දූෂණයක් කළැයි විත්තිකරුට එරෙහිව අල්ලස් කොමිසම විසින් මහාධිකරණය හමුවේ නඩු පවරා තිබිණි. මෙම සිද්ධියේදී නියමිත ක්‍රමවේදයෙන් බැහැරව අධ්‍යාපන අධ්‍යක්ෂවරයාගේ නිසි අනුමැතියකින් තොරව අදාල දරුවා පාසලට ඇතුලත් කර ඇති බව විමර්ශනයේදී අනාවරණය වී තිබූ බව අල්ලස් කොමිසම දන්වා සිටියේය.
